O‘zbekiston chegalarida yanvar—mart oylarida 503,6 kilogramm giyohvandlik vositalari, 1 million dollar naqd xorijiy valyuta ushlab qolingan. Bu haqda 20-aprel kuni AOKAda bo‘lib o‘tgan brifingda Davlat bojxona qo‘mitasi axborot xizmati boshlig‘i Husan Tangriyev ma’lum qildi, deya xabar bermoqda “Daryo” muxbiri.
Husan Tangriyevning aytishicha, 2022-yilning birinchi choragida yashirin iqtisodiyotdan undirilgan mablag‘lar miqdori o‘tgan yildagiga nisbatan 35 foizga oshdi.
“Birinchi chorakda tashqi savdoda “yashirin iqtisodiyot” ulushini qisqartirishga qaratilgan tizimli tadbirlar natijasida 221 milliard so‘mlik qo‘shimcha bojxona to‘lovlari undirildi. O‘tgan 3 oy davomida davlat budjetiga 9,5 trillion so‘m bojxona to‘lovlari o‘tkazildi va tushumlar 2021-yilning mos davriga nisbatan 3 trillion so‘mga (46 foiz) oshdi. Ishlab chiqarishni rag‘batlantirish, tadbirkorlik subyektlari o‘rtasida raqobat muhitini rivojlantirish maqsadida 3 ming nafardan ziyod tadbirkorlarga bojxona to‘lovlaridan qariyb 4 trillion so‘mlik bojxona imtiyozlari berildi”, – dedi qo‘mita rasmiysi.
Husan Tangriyevning ta’kidlashicha, bojxona organlari faoliyatda kontrabanda ashyolari, shu jumladan giyohvandlik vositalarining qonunga xilof muomalasiga qarshi kurashishga alohida e’tibor qaratilmoqda.
“Tezkor tadbirlarda o‘tgan yilning shu davriga nisbatan 9 barobar ko‘p, ya’ni 503,6 kilogramm giyohvandlik vositalari ushlab qolindi. 101 ming dona kuchli ta’sir etuvchi va 1,6 ming dona psixotrop moddalar to‘xtatib qolindi. Shuningdek, 1 million dollarga teng naqd xorijiy valyuta to‘xtatib qolingan bo‘lib, bu ko‘rsatkich o‘tgan yilning shu davriga nisbatan 10 barobarga ortgan. Birinchi chorakda bojxona xodimlari tomonidan qiymati 5,2 milliard so‘mlik zargarlik buyumlari, 170 ming quti tamaki mahsulotlari va 490 dona madaniy boyliklarning noqonuniy aylanuvi oldi olindi”, – dedi qo‘mita axborot xizmati rahbari.
Avvalroq Samarqand viloyatida opiy va gashish giyohvand moddalari aylanmasiga chek qo‘yilgani xabar qilingandi. Shuningdek, Buxoroda giyohvand moddani 2,5 ming dollarga sotishga uringan Afg‘oniston fuqarosini ushlangandi ochiqlangan.
Izoh (0)