Ўзбекистон чегаларида январь—март ойларида 503,6 килограмм гиёҳвандлик воситалари, 1 миллион доллар нақд хорижий валюта ушлаб қолинган. Бу ҳақда 20 апрель куни АОКАда бўлиб ўтган брифингда Давлат божхона қўмитаси ахборот хизмати бошлиғи Ҳусан Тангриев маълум қилди, дея хабар бермоқда «Дарё» мухбири.
Ҳусан Тангриевнинг айтишича, 2022 йилнинг биринчи чорагида яширин иқтисодиётдан ундирилган маблағлар миқдори ўтган йилдагига нисбатан 35 фоизга ошди.
«Биринчи чоракда ташқи савдода «яширин иқтисодиёт» улушини қисқартиришга қаратилган тизимли тадбирлар натижасида 221 миллиард сўмлик қўшимча божхона тўловлари ундирилди. Ўтган 3 ой давомида давлат бюджетига 9,5 триллион сўм божхона тўловлари ўтказилди ва тушумлар 2021 йилнинг мос даврига нисбатан 3 триллион сўмга (46 фоиз) ошди. Ишлаб чиқаришни рағбатлантириш, тадбиркорлик субъектлари ўртасида рақобат муҳитини ривожлантириш мақсадида 3 минг нафардан зиёд тадбиркорларга божхона тўловларидан қарийб 4 триллион сўмлик божхона имтиёзлари берилди», – деди қўмита расмийси.
Ҳусан Тангриевнинг таъкидлашича, божхона органлари фаолиятда контрабанда ашёлари, шу жумладан гиёҳвандлик воситаларининг қонунга хилоф муомаласига қарши курашишга алоҳида эътибор қаратилмоқда.
«Тезкор тадбирларда ўтган йилнинг шу даврига нисбатан 9 баробар кўп, яъни 503,6 килограмм гиёҳвандлик воситалари ушлаб қолинди. 101 минг дона кучли таъсир этувчи ва 1,6 минг дона психотроп моддалар тўхтатиб қолинди. Шунингдек, 1 миллион долларга тенг нақд хорижий валюта тўхтатиб қолинган бўлиб, бу кўрсаткич ўтган йилнинг шу даврига нисбатан 10 баробарга ортган. Биринчи чоракда божхона ходимлари томонидан қиймати 5,2 миллиард сўмлик заргарлик буюмлари, 170 минг қути тамаки маҳсулотлари ва 490 дона маданий бойликларнинг ноқонуний айлануви олди олинди», – деди қўмита ахборот хизмати раҳбари.
Аввалроқ Самарқанд вилоятида опий ва гашиш гиёҳванд моддалари айланмасига чек қўйилгани хабар қилинганди. Шунингдек, Бухорода гиёҳванд моддани 2,5 минг долларга сотишга уринган Афғонистон фуқаросини ушланганди очиқланган.
Изоҳ (0)