18-aprel kuni axborot texnologiyalari va kommunikatsiyalarini rivojlantirish vaziri Sherzod Shermatov Microsoft kompaniyasi vakillari bilan onlayn uchrashuv o‘tkazdi. Bu haqda AKT vazirligi matbuot xizmati xabar berdi.
Yig‘ilishda Microsoft kompaniyasi, Amerika—O‘zbekiston Savdo palatasi va O‘zbekistonning AQSHdagi elchixonasi vakillari ishtirok etgan hamda hamkorlikning dolzarb va istiqbolli yo‘nalishlari muhokama qilingan.
Bundan tashqari, IT-ta’limni rivojlantirishga jiddiy e’tibor qaratish, ushbu jarayonlarga ko‘proq yoshlarni jalb etish, malakali kadrlar tayyorlash masalalari ko‘rilgan.
Shuningdek, AKT vazirligi tomonidan O‘zbekistonda Microsoft kompaniyasining ofisini ochish taklifi berilgan.
“Tomonlar hamkorlikni yanada mustahkamlash va qo‘shma loyihalarni amalga oshirish bo‘yicha ishlarni davom ettirishga tayyor ekanliklarini bildirdilar”, — deyiladi xabarda.
Avvalroq World of Tanks o‘yinini yaratgan kompaniya O‘zbekistonda o‘z ofisini ochishi mumkinligi, AKT vaziri Sherzod Shermatov O‘zbekistonga ko‘chib o‘tmoqchi bo‘lgan IT-kompaniyalar zarur infratuzilma bilan ta’minlanishini aytgani to‘g‘risida xabar berilgandi.
Izoh (0)