Farzandini davolatish uchun saxovatli insonlardan yordam so‘rab internetda e’lon bergan angrenlik ayolning pullarini o‘zlashtirib olgan maktab o‘quvchisi ushlandi, deb xabar beradi Toshkent viloyati IIBB matbuot kotibi.
Angren shahri “Taraqqiyot” MFYda yashovchi 45 yoshli fuqaro M.S. IIBga ariza bilan murojaat qilib, farzandini davolatish uchun moddiy yordam yig‘ish maqsadida ijtimoiy tarmoqda e’lon qilgan plastik kartasi hisobiga 600 ming o‘tkazishini aytib, qo‘ng‘iroq qilgan noma’lum kimsa uning hisobidagi 2 million so‘mni yechib olganini bildirgan va holat yuzasidan qonuniy chora ko‘rishni so‘ragan.
Arizaga asosan Toshkent viloyati IIBB axborot texnologiyalari sohasidagi jinoyatlarga qarshi kurashish hamda shahar IIB JQB tezkor xodimlari tomonidan olib borilgan surishtiruv ishlari natijasida ushbu jinoyatni Qoraqalpog‘iston Respublikasida yashovchi 18 yoshli J.A. (11-sinf o‘quvchisi) sodir etgani aniqlangan.
Ushbu holat yuzasidan fuqaro J.A. ga nisbatan Jinoyat kodeksining 169-moddasi (o‘g‘rilik) 1-qismi bilan jinoyat ishi qo‘zg‘atilgan. Tergov harakatlari olib borilmoqda.
Bundan oldin Buxoroda xayriya plastik kartasiga yig‘ilgan 1 million so‘mni o‘g‘irlagan 18 yoshli fuqaro qo‘lga olingani, Toshkent viloyatida Telegram orqali o‘zganing plastik kartasidan 2,5 million so‘m yechib olgan 10-sinf o‘quvchisi ushlangani to‘g‘risida xabar berilgandi.
Mavzuga doir:
- Samarqandlik 19 yoshli qiz uch yoshli E’zozani davolash uchun berilgan 25 mln so‘mlik xayriya pullarini o‘zlashtirishga urindi
- Farg‘onada firibgar erkak Toshkentdagi bemorlarning xayriya pullarini o‘zlashtirib olgani aniqlandi
- Toshkentda xayriya pullarini o‘g‘irlash bilan shug‘ullangan kiberfiribgarlar guruhi qo‘lga olindi (video)
Izoh (0)