Jizzaxda maktab o‘quvchilarini olib ketayotgan Saz rusumli avtobuslar ishtirokida YTH yuz berdi. Bu haqda “Yoshlar” telakanalining “Davr” informatsion dasturida ma’lum qilindi.
Qayd etilishicha, voqea 17-aprel kuni soat 17:00 larda Toshkent—Termiz M-39 yo‘lining 1018-kilometrida yuz bergan. O‘quvchilar Samarqand shahriga sahoyat uchun olib borilgan va qaytishda — Jizzaxning G‘allaorol tumanida haydovchilarning belgilangan masofani saqlamasligi oqibatida biri ikkinchisining orqasiga borib urilgan.
Oqibatda Sharof Rashidov tumani Xalq ta’limi bo‘limiga qarashli maktabning ikki nafar 8-sinf o‘quvchisi yengil tan jarohati olgan va Respublika shoshilinch tibbiy yordam ilmiy markazi Jizzax filialida ularga birinchi tibbiy yordam ko‘rsatilgan. Boshqa hech kim jabrlanmagan.
O‘rganishlar natijasida YTHda ishtirok etgan avtobuslar Zarbdor tumani XTBga qarashli 2-maktab rahbariyati tomonidan yollangani, maktab mas’ullari o‘quvchilarni o‘zboshimchalik bilan, tegishli davlat organlari ruxsati va kuzatuvisiz XTBni ogohlantirmasdan, sahoyatga olib borishgani ma’lum bo‘lgan. So‘ng xavfsizlik choralarini ko‘rish maqsadida YPX xodimlari tomonidan sayohatga borgan boshqa avtobuslardan iborat jamlanma safiga qo‘shib olingan.
Ammo shunda ham yo‘l qoidalariga beparvo qaralgani sabab yuqoridagi YTH yuz bergan.
Xabarda aytilishicha, maktabning mas’uliyatsizlikka yo‘l qo‘ygan xodimlarini ishdan olish choralari ko‘rilgan. Shuningdek, yo‘l harakati qoidalariga amal qilmagan haydovchiga ham Ma’muriy javobgarlik to‘g‘risidagi kodeksning tegishli moddalari bilan chora ko‘rilgan.
Eslatib o‘tamiz, 2019-yilining aprelida O‘rta Chirchiq tumanida o‘quvchilarni Buxoroga sayohatga olib borib qaytayotgan avtobus balloni yorilib, beton to‘siqqa urilib, yong‘in chiqqandi. Yo‘lovchilar avtobusdan zudlik bilan evakuatsiya qilingan.
Izoh (0)