“Visa uchun O‘zbekistonga, Zara uchun Qozog‘istonga” — sanksiyalar ostida qolgan rossiyaliklar vaziyatdan chiqish yo‘llarni qanday topyapti?

Rossiya sayyohlik agentliklari qo‘shni davlatlar — O‘zbekiston, Qozog‘iston, Ozarbayjon va Armanistonga qisqa muddatli sayohat turlarini sotishni boshladi. Bu haqda EAN nashri xabar bermoqda.

Sayohatlar doirasida mashhur do‘konlarda xarid qilish, valyuta sotib olish yoki butun dunyo bo‘ylab cheklovlarsiz amal qiladigan bank kartalarini ochish imkoniyatlari taklif etilmoqda.

Visa va Mastercard kartalari yordamida O‘zbekiston, Ozarbayjon va Armanistonga sayohat  rejalari ishlab chiqqan turoperatorlar sayyohlarni faqat bitta pasport bilan ro‘yxatdan o‘tishini ta’minlamoqchi.

Turoperatorlar sayyohlarga bankka tashrif buyurish va karta ochish bilan bog‘liq barcha rasmiyatchiliklarda yordam berish xizmatlarini oldindan ishlab chiqqanliklarini ta’kidlashmoqda. Qayd etilishicha, kartani olish muddati atigi bir kun.

Shuningdek, xohlovchilar ushbu mamlakatlar banklarida yevro va dollar xarid qilishlari mumkin bo‘ladi. Narx turar joy va dasturga qarab hisoblanadi.

Masalan, VEDI operatori “Visa uchun — O‘zbekiston” sayohat turini ishlab chiqdi. Uning doirasida turistlar bank kartasini ochishi mumkin. Ekskursiyaning davomiyligi ikki kechadan boshlanadi. Narxi esa bir kishi uchun 23 ming rublni tashkil qiladi.

Bundan tashqari, O‘zbekiston bo‘ylab “Xo‘ja Nasriddin qidirilmoqda” nomli o‘ziga xos hunarmandchilik sayohati ham taqdim etilyapti. 1-maydan 15-maygacha davom etadigan 7-kechalik bu turning narxi bir kishi uchun 57 800 rublni (700 dollar atrofida) tashkil qiladi.

Sayyohlarga Toshkent—Buxoro—Samarqand yo‘nalishi bo‘yicha guruhli sayohat, diqqatga sazovor joylarga tashrif buyurish, folklor ko‘rgazmasi va samarqandlik dizayner Valentina Romanenkoning modalar ko‘rgazmasi, shuningdek, uning do‘konida buyumlar xarid qilish imkoniyatlari taklif etilmoqda.

Bundan tashqari, aholi uchun yana bir sayohat turi taklif qilinadi. “Zara uchun Qozog‘istonga” deb nomlangan ushbu uch kechalik sayohat nonushta bilan birga 315 dollar (taxminan 25 200 rubl) deb baholandi. Dasturda Nur-Sulton shahridagi Mega Silk Way va Xan-Shatyr yirik savdo markazlari, shuningdek, Bayterek, Nur-Alem markazi va boshqa diqqatga sazovor joylarga tashrif buyurish ko‘zda tutilgan.

Best Tour Rossiya sayyohlik agentligi direktori Natalya Pribavkina EAN’ga ma’lum qilishicha, operatorlar faqat o‘tgan juma kuni bunday do‘kon sayohat-turlarini taqdim etgan. Lekin hozircha bu tur uchun xaridor topilmagan.

Ammo, menimcha, bu turga bo‘lgan talab garchi oddiy ta’tildagidek katta bo‘lmasa-da, lekin topiladi. Bundan tashqari, diqqatga sazovor joylarda haqiqatan ham qiziqarli sayohat qilish imkoniyati mavjudligi bu ehtimollikni oshiradi. Yiliga bir marta Yevropaga sayohat qilib, savdo nuqtalarida butun oila a’zolari uchun kiyim-kechak sotib olgan sayyohlarim ko‘p. Bundan tashqari, oldin Gretsiyaga aynan xarid qilish uchun uyushtiriladigan sayohatlar ham juda mashhur bo‘lgan. O‘ylaymanki, MDH mamlakatlarida uyushtiriladigan bunday turlar uchun ham iste’molchilar paydo bo‘ladi, — deydi Natalya Pribavkina.

Shuningdek, Ural turizm assotsiatsiyasi ijrochi direktori Mixail Maltsev turizm sohasi vakillarining har qanday ijodiy tashabbusini, jumladan, yangi sayohat turlarini olqishlashini qayd etadi.

Avvalroq O‘zbekistonga turli mamlakatlardan kelgan turistlar qancha pul sarflashlari ma’lum qilingan edi.