Surxondaryo viloyatining Uzun tumanida fuqaroga yer rasmiylashtirib berish evaziga undan pul olgan korxona rahbari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Uzun tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruv davomida chorvachilik yo‘nalishiga ixtisoslashgan “A.” xususiy korxonasi rahbari X.T. fuqaro B.ning ishonchiga kirib, unga korxonaning qishloq xo‘jaligida foydalanadigan 20 sotix yer maydonini tomorqa sifatida rasmiylashtirib berishni va’da qilgani aniqlangan. Buning evaziga u fuqarodan 16,5 ming dollarni firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Davlat kadastrlari palatasi Nurobod tuman filiali mutaxassislari 2 million so‘m pora bilan ushlangani, Samarqandda 1 gektar yerni 430 ming dollarga sotishga uringan shaxslar qo‘lga olingani, Andijonda temiryo‘l stansiyasi boshlig‘i aka-ukaga yer olib berish uchun 8 ming dollar olgani aniqlangani to‘g‘risida xabar berilgandi.
Izoh (0)