Сурхондарё вилоятининг Узун туманида фуқарога ер расмийлаштириб бериш эвазига ундан пул олган корхона раҳбари аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Узун туман бўлими томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилган. Текширув давомида чорвачилик йўналишига ихтисослашган «А.» хусусий корхонаси раҳбари Х.Т. фуқаро Б.нинг ишончига кириб, унга корхонанинг қишлоқ хўжалигида фойдаланадиган 20 сотих ер майдонини томорқа сифатида расмийлаштириб беришни ваъда қилгани аниқланган. Бунинг эвазига у фуқародан 16,5 минг долларни фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Давлат кадастрлари палатаси Нуробод туман филиали мутахассислари 2 миллион сўм пора билан ушлангани, Самарқандда 1 гектар ерни 430 минг долларга сотишга уринган шахслар қўлга олингани, Андижонда темир йўл станцияси бошлиғи ака-укага ер олиб бериш учун 8 минг доллар олгани аниқлангани тўғрисида хабар берилганди.
Изоҳ (0)