Toshkent shahrining Yashnobod tumanida tadbirkorga ma’lum bir mablag‘ evaziga imtiyozli kredit olib berishni va’da qilgan shaxslar qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departamentning Yashnobod tuman bo‘limi tomonidan DXX xodimlari bilan hamkorlikda tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbir davomida M.M. va S.N. ismli shaxslar “D” MCHJ rahbari X.ning ishonchiga kirib, unga yuqori lavozimda ishlovchi tanishlari orqali Toshkent shahrida faoliyat yurituvchi tijorat bankidan 2 million dollari miqdorida imtiyozli kredit olib berishni va’da qilgani aniqlangan. Ular kredit summasining 5 foizini hisoblab, ya’ni 100 ming AQSH dollari ustama puli so‘ragan va shundan 55 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘ona va Namanganda o‘zgalar nomiga kredit rasmiylashtirgan shaxslarga jinoyat ishi ochilgani, Namanganda qaynota o‘g‘lining qarzini to‘lash uchun kelini nomiga 2 mlrd so‘m kredit olgani, Toshkent viloyatida 2,6 mlrd so‘m kredit mablag‘larini talon-toroj qilgan bank xodimi ushlangani to‘g‘risida xabar berilgandi.
Izoh (0)