Farg‘ona viloyatida transport boshqarmasi inspektoriga 500 ming so‘m pora taklif qilgan haydovchi qo‘lga olindi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2022-yilning 12-aprel kuni viloyat transport boshqarmasi bo‘lim inspektori E.X. ichki ishlar idoralariga ariza bilan murojaat qilgan. Arizada fuqaro J.S. Cobalt mashinasida litsenziyasiz yo‘lovchi tashish faoliyati bilan shug‘ullanib kelayotgani bo‘yicha aniqlangan huquqbuzarlik holati yuzasidan ma’muriy bayonnoma tuzmaslik va javobgarlikka tortmaslik evaziga 500 ming so‘m pora taklif qilganini bildirgan.
Inspektorning arizasi asosida shu kunning o‘zida Farg‘ona viloyat IIB Korrupsiya va iqtisodiy jinoyatlarga qarshi kurashish bo‘limi, departamentning Qo‘qon shahar bo‘limi xodimlari hamkorligida tezkor tadbir o‘tkazilgan. Tadbir davomida fuqaro J.S. Qo‘qon shahar Navbahor ko‘chasida E.X.ga 500 ming so‘m miqdoridagi pullarni pora tariqasida berayotgan vaqtida ushlangan. Pullar xolislar ishtirokida daliliy ashyo tariqasida rasmiylashtirib olingan.
Mazkur holat yuzasidan tergovga qadar tekshiruv harakatlari olib borilmoqda.
Izoh (0)