Maxsus guruhlar Mariupoldagi “Azovstal” metallurgiya zavodiga hujumni boshladi, dedi o‘zini o‘zi respublika deb e’lon qilgan Donetsk Xalq Respublikasi xalq militsiyasi vakili Eduard Basurin.
“Azovstal — shahar markazida joylashgan sanoat zonasi. Bilishimcha, ushbu obyektga bostirib kirish uchun maxsus tanlangan hujum guruhlarining bir qismi allaqachon o‘z ishini boshlagan”, — dedi Basurin “Rossiya 24” kanali efirida. Unga ko‘ra, Rossiya aviatsiyasi va artilleriyasi hujumda “yordam” qilmoqda.
Rossiya Mudofaa vazirligi singari Basurin ham “Azovstal”da tinch aholi borligi haqidagi ma’lumotni feyk deb hisoblamoqda. Zavodda ayollar va bolalar borligi haqida avvalroq Ukraina dengiz korpusining 36-alohida brigadasi komandiri mayor Sergey Volin gapirgan edi.
Deyarli butunlay Rossiya nazoratiga o‘tgan Mariupolda hali ukrainalik harbiylar bor. Qarshilikning asosiy markazi — “Azovstal” zavodidir.
Rossiya harbiylari Mariupolda ukrainalik askarlarga taslim bo‘lishni bir necha bor taklif qilgan. 17-aprel kuni Rossiya Mudofaa vazirligi vakili Igor Konashenkov yana bir bor “Azovstal” hududida bo‘lgan “jangarilarga” qurollarini topshirishni taklif qildi. Uning so‘zlariga ko‘ra, zavodda 2500 dan ortiq jangchi, jumladan, 400 ga yaqin xorijlik yollanma askar qamalda qolgan. Konashenkov, “qarshilik davom etsa, ularning barchasi yo‘q qilinishini” aytdi.
18-aprel kuni kechqurun Ukraina prezidenti Vladimir ZelenskiyRossiya Donbassni egallash uchun jang boshlaganini ma’lum qildi.
Izoh (0)