Rossiya va Vyetnam yangi xalqaro harbiy mashg‘ulotlarni o‘tkazadi, ular davomida topshiriqlarni bajarish uchun nostandart yechimlar ishlab chiqiladi hamda murakkab sharoitda bo‘linmalarni boshqarish mashq qilinadi. Rossiya Sharqiy harbiy okrug (SHHO) shtab-kvartirasida mashg‘ulotlarga tayyorgarlik ko‘rish bo‘yicha birinchi konferensiya bo‘lib o‘tdi, deb xabar bermoqda “TASS” okrug matbuot xizmatiga tayanib.
Qayd etilishicha, konferensiya okrug nazorat markazi boshlig‘i, general-mayor Sergey Lagutkin va xalqaro harbiy hamkorlik boshqarmasi boshlig‘i, polkovnik Ivan Tarayev boshchiligida o‘tkazilgan. Vyetnam xalq armiyasi tomonidan tadbirda harbiy hokimiyat ofitserlari va general-mayor Don Din Txan ishtirok etgan.
“Sharqiy harbiy okrug shtab-kvartirasida birinchi marta Rossiya—Vyetnam qo‘shma harbiy mashg‘ulotlarini rejalashtirish bo‘yicha konferensiya tashkil etildi va o‘tkazildi. Delegatsiyalarning uchrashuvi videoaloqa shaklida bo‘lib o‘tdi. Polkovnik Ivan Tarayevning aytishicha, xalqaro o‘quv mashg‘ulotlarini o‘tkazishdan ko‘zlangan maqsadlar qo‘mondon va shtablarning jangovar tayyorgarlik operatsiyalarini tashkil etish va murakkab taktik sharoitda bo‘linmalarni boshqarish bo‘yicha amaliy ko‘nikmalarini oshirish, shuningdek, topshiriqlarni bajarishda nostandart yechimlarni ishlab chiqishdan iborat bo‘ladi”, — deyiladi xabarda.
Shuningdek, muhokamada mashg‘ulot nomi sifatida “Kontinental ittifoq – 2022” taklif qilingan. Muzokaralar chog‘ida Rossiya va Vyetnam tomonlari bo‘lajak harbiy mashg‘ulotlar mavzusi bo‘yicha kelishib olgan va ular o‘tkaziladigan sana va joyni belgilagan. Bundan tashqari, tomonlar harbiy xizmatchilarni tibbiy va moddiy-texnik ta’minlash, madaniy va sport dasturlari masalalarini muhokama qilgan.
Eslatib o‘tamiz, fevral oyida Rossiya va Belarus harbiylarining “Ittifoqchilik jasorati” nomli qo‘shma o‘quv mashg‘ulotlari bo‘lib o‘tgandi. Manyovrlar Belarusdagi umumqo‘shin poligonlarida o‘tkazilgan.
Izoh (0)