Махсус гуруҳлар Мариуполдаги «Азовстал» металлургия заводига ҳужумни бошлади, деди ўзини ўзи республика деб эълон қилган Донецк Халқ Республикаси халқ милицияси вакили Эдуард Басурин.
«Азовстал — шаҳар марказида жойлашган саноат зонаси. Билишимча, ушбу объектга бостириб кириш учун махсус танланган ҳужум гуруҳларининг бир қисми аллақачон ўз ишини бошлаган», — деди Басурин «Россия 24» канали эфирида. Унга кўра, Россия авиацияси ва артиллерияси ҳужумда «ёрдам» қилмоқда.
Россия Мудофаа вазирлиги сингари Басурин ҳам «Азовстал»да тинч аҳоли борлиги ҳақидаги маълумотни фейк деб ҳисобламоқда. Заводда аёллар ва болалар борлиги ҳақида аввалроқ Украина денгиз корпусининг 36-алоҳида бригадаси командири майор Сергей Волин гапирган эди.
Деярли бутунлай Россия назоратига ўтган Мариуполда ҳали украиналик ҳарбийлар бор. Қаршиликнинг асосий маркази — «Азовстал» заводидир.
Россия ҳарбийлари Мариуполда украиналик аскарларга таслим бўлишни бир неча бор таклиф қилган. 17 апрель куни Россия Мудофаа вазирлиги вакили Игорь Конашенков яна бир бор «Азовстал» ҳудудида бўлган «жангариларга» қуролларини топширишни таклиф қилди. Унинг сўзларига кўра, заводда 2500 дан ортиқ жангчи, жумладан, 400 га яқин хорижлик ёлланма аскар қамалда қолган. Конашенков, «қаршилик давом этса, уларнинг барчаси йўқ қилинишини» айтди.
18 апрель куни кечқурун Украина президенти Владимир ЗеленскийРоссия Донбассни эгаллаш учун жанг бошлаганини маълум қилди.
Изоҳ (0)