Janubiy Afrika Respublikasi (JAR) sharqidagi Durban shahrida suv toshqinlari qurbonlarining soni 395 kishiga yetdi, deb xabar bermoqda The Guardian.
O‘nlab odamlar hanuz bedarak yo‘qolgan. Ularni JAR politsiyasi, armiya va ko‘ngilli qutqaruvchilar qidirmoqda.
Toshqinlar u yoki bu tarzda 41 mingga yaqin odamga ziyon yetkazdi. 13,5 mingdan ortiq uy zarar ko‘rgan, shundan deyarli 4 mingtasi butunlay vayron bo‘lgan.
Janubiy Afrika Kvazulu-Natal provinsiyasining ayrim qismlarida so‘nggi hafta 48 soat ichida 450 millimetrdan ortiq yomg‘ir yog‘di — bu Durbandagi yillik 1009 millimetr yog‘ingarchilikning qariyb yarmiga teng.
Shu bilan birga, sinoptiklar dam olish kunida yomg‘ir ko‘proq yog‘ishini, ammo hafta boshidagidek kuchli bo‘lmasligini prognoz qilmoqda.
Avvalroq 306 nafar odam halok bo‘lgani haqida xabar berilgandi. JARda 60 yil ichidagi eng katta suv toshqinlari kuzatilmoqda. Tabiiy ofat sabab Durbanda va shahar atrofidagi hududlarda ko‘priklar hamda yo‘llarga jiddiy talafot yetgan. JAR prezidenti suv toshqinlaridan talafot ko‘rgan hududlarda borib, u yerdagi aholiga hamdardlik bildirgan.
Avval Braziliyada yuz bergan suv toshqinlari va ko‘chki oqibatida 150 dan ziyod odamning halok bo‘lgani, Madagaskarga yopirilgan bo‘ron qurbonlarining soni 100 dan oshgani, Ekvador poytaxtidagi suv toshqini oqibatida 11 kishi halok bo‘lgani haqida xabarlar berilgan.
- Braziliyada ko‘chki oqibatida 94 kishi halok bo‘ldi, ulardan sakkiz nafari voyaga yetmaganlar (video)
- “Ana” tropik bo‘roni Afrika sharqiy sohillarini vayron qildi. O‘nlab odamlar halok bo‘ldi, 100 minglab insonlar o‘z uylarini tark etdi. Malavi, Mozambik va Madagaskardagi tabiiy ofat talafotlari (foto)
- JARda tropik bo‘ron oqibatida 70 kishi halok bo‘ldi
Izoh (0)