Россия босқини бошлангандан бери Украинада камида 202 нафар бола ҳалок бўлди, деб хабар қилмоқда мамлакат бош прокуратураси. Яна 361 нафар бола жароҳатланган.
Жабрланган болаларнинг аксарияти Донецк (117), Киев (106) ва Харьков вилоятларига (89) тўғри келади. Идорада таъкидланишича, бу рақамлар якуний эмас, чунки фаол ҳарбий ҳаракатлар олиб борилган ҳудудларда қурбонларни ҳисоб қилиш ҳали давом этмоқда.
Россия қуролли кучлари томонидан мамлакат бўйлаб ўққа тутилиш ва бомбардимон қилинишлар оқибатида 1018 та таълим муассасаси зарар кўрган, улардан 95 таси бутунлай вайрон бўлган, дея хабар берди бош прокуратура.
Украина президенти Владимир Зеленский CNN телеканалига берган интервьюсида уруш бошлангандан буён ҳарбий ҳаракатлар оқибатида 2,5 мингдан 3 минг нафаргача украиналик ҳарбий ҳалок бўлганини маълум қилганди. Давлат раҳбарининг сўзларига кўра, яна 10 мингга яқин ҳарбий хизматчи яраланган. «Уларнинг қанчаси омон қолишини айтиш қийин», — дея қўшимча қилган Зеленский.
Кейинроқ Россия Мудофаа вазирлиги расмий вакили Игорь Конашенков брифинг чоғида Украина армияси ва Миллий гвардияси, шунингдек, чет эллик ёлланма аскарларнинг тузатиб бўлмайдиган йўқотишлари 23 367 кишини ташкил қилиши ҳақида гапирди.
Унга кўра, 16 апрель ҳолатига биргина Мариуполда 4000 дан ортиқ аскар ҳалок бўлган, яна 1464 нафари таслим бўлган. Қолганлар «Азовстал» металлургия заводи ҳудудида қамалга олинган.
Брифингда Конашенков, шунингдек, Россия ҳаво ҳужумидан мудофаа тизимлари Ғарб қуролларининг катта партиясини етказиб бераётган Украина ҳарбий-транспорт самолётини Одесса вилоятида уриб туширганини ҳам айтди.
Изоҳ (0)