“Mana, aprel oyi ham yarmidan o‘tdi, lekin loyiha haqida shu paytgacha yangilik yo‘q” — Xayrulla Nuriddinov “Sog‘lom turmush tarzi” platformasi haqida

Jurnalist Xayrulla Nuriddinov “O‘zbekiston 24” telekanalida efirga uzatilgan “Menimcha” ko‘rsatuvida “Sog‘lom turmush tarzi” platformasi haqida fikr bildirdi.

Uning aytishicha, pandemiya paytida odamlarimizning yondosh kasalliklari ko‘p va o‘zbilarmonlik bilan dori-darmon qilishga o‘rgangan.

Bu ko‘pchilikning ahvolini tang qilib qo‘ygani ma’lum. O‘zimizni o‘zimiz davolashga, shifokor aytmasa ham qanaqadir dorini sotib olib ichishga, osma ukol olishga mukkasidan ketganmiz. Chunki, bu o‘zimizni yaxshi his qilishning oson yo‘li. Sog‘lom bo‘lish uchun parhez qilish, vaznni muvozanatda saqlash, sport bilan shug‘ullanish yoqmaydi-da bizga.

Yana bitta masala esimga tushdi: o‘tgan yili har kuni 10 ming qadam yurgan odamga 3 ming so‘mdan mukofot beriladigan “Sog‘lom turmush tarzi” platformasi ishga tushgandi. Tongda va kechki taomdan so‘ng piyoda yuruvchilar ko‘payib qolgandi. Keyinchalik bu platforma takomillashtirilishi, buning uchun davlat budjetidan 100 milliard so‘m ajratilishi, shu yilning 1-martidan har hafta 100 millionli pul va yutuqli o‘yinlar tashkil qilinishi aytildi-yu, ammo tinchib ketdi. Mana, aprel oyi ham yarmidan o‘tdi, lekin loyiha haqida shu paytgacha yangilik yo‘q. Albatta, sog‘lom va faol bo‘lishni istagan odamga loyihaning ishlamayotgani bahona bo‘lolmaydi-yu, ammo tegishli mutasaddi tashkilotlar shu loyihani tezroq yo‘lga qo‘ysa, mayli-da, piyoda yuradiganlarning soni yana ko‘payib qolarmidi, menimcha.

Asosiy mavzuga qaytadigan bo‘lsam, albatta, dori-darmonsiz tuzalmaydigan kasalliklar ko‘p. Odamlar dorixonaga uzun ro‘yxat bilan kirib, cho‘ntakni bo‘shatib chiqib ketadi. Davlat rahbari aytgandek, bemori bor oila oyligining 60 foizini dori-darmonga ishlatyapti. Odamning joni og‘rib tursa, ko‘ziga pul ko‘rinmaydi, albatta.

Xayrulla Nuriddinov