“Xorazmda 560 gektar yerga issiqxona quriladi” — Farhod Ermanov

Shavkat Mirziyoyev boshchiligida 15-aprel kuni oziq-ovqat mahsulotlari ishlab chiqarishni ko‘paytirish orqali bozorlarda narx-navo barqarorligini ta’minlash hamda biznesni qo‘llab-quvvatlash bo‘yicha qo‘shimcha sharoitlar yaratishga bag‘ishlangan yig‘ilish bo‘lib o‘tdi. Yig‘ilishda viloyatlarda oziq-ovqat bozorida narxlar barqarorligini saqlashning imkoni bormi, degan savol Buxoro, Surxondaryo va Xorazm hokimlariga berildi.

Xorazm hokimi Farhod Ermanov prezidentga qilinayotgan ishlar yuzasidan hisobot berdi. Bu lavha “O‘zbekiston 24” telekanalining “Menimcha” ko‘rsatuvida ma’lum qilindi.

“Yilning oxirigacha 560 gektar yerda issiqxonalarimiz bo‘ladi. Bularda yetishtirilgan mahsulotlar, asosan, eksportga yo‘naltiriladi. Shu bilan birga, ichki bozor ham ta’minlanadi. Bu ham bizga qo‘shimcha imkoniyat, ish o‘rni hamda eksport mahsulot turi bo‘ldi”, — dedi Xorazm viloyati hokimi Farhod Ermanov.

Prezident hokimning hisobotini qo‘lga olib, buni qanday tayyorlagani bilan qiziqdi.

“Hisob-kitob bo‘yicha bizga yozib bergansan, to‘g‘rimi, mana o‘zing qo‘l qo‘yib. Buni qanday yozding, ichiga kirib, o‘qib yozdingmi?”, — deya so‘radi Shavkat Mirziyoyev. Bunga javoban hokim:

“Qo‘lingizdagi har bir raqamning tagida hammasining (mas’ullarning) ism familiyasi yozilgan. Har bir tuman hokimining o‘ziga yo‘nalishlar bo‘yicha belgilab, vazifa tashab, shularning hisob-kitobini qilib ishladik”, — dedi Ermanov.

Davlat rahbari qilinadigan ishlar va bozordagi kutilgan narx-navo haqida mahallagacha xabardor qilish kerakligini aytdi.