AQSH davlat kotibi Entoni Blinkenning fikricha, Rossiyaning Ukraina hududidagi maxsus harbiy operatsiyasi 2022-yil oxiriga qadar davom etishi mumkin. Bu haqda CNN telekanali ikkita yevropalik amaldorga tayanib, xabar berdi.
Telekanal suhbatdoshlarining so‘zlariga ko‘ra, AQSH va Yevropaning ko‘plab rasmiy shaxslari tobora mojaro qisqa muddatda tugamaydi, degan xulosaga kelmoqda va Rossiya prezidenti Vladimir Putinning yakuniy maqsadlari o‘zgarishiga hech qanday ishora yo‘q.
Shuningdek, manbalarning ta’kidlashicha, amaldorlarda Ukrainadagi vaziyatning uzoq davom etishi borasidagi fikr “Rossiya Kiyevni tezda egallashi kutilayotgan maxsus operatsiyaning dastlabki kunlaridan sezilarli chekingani” fonida shakllangan.
CNN bilan suhbatlashgan yevropalik amaldorlarga ko‘ra, Ukraina sharqidagi jangovar harakatlar to‘rt oydan yarim yilga qadar davom etishi, shundan so‘ng “vaziyat oxiri berk ko‘chaga kirib qolishi” mumkin.
Rossiya prezidenti Vladimir Putin 24-fevral kuni Ukrainada “denasifikatsiya va demilitarizatsiya” maqsadida harbiy operatsiya boshlanganini e’lon qildi. Kiyev Moskva bilan diplomatik munosabatlarni uzdi va harbiy holat joriy qildi.
13-mart kuni “Rosgvardiya” rahbari Viktor Zolotov harbiy operatsiya “kutilganidek tez ketmayotganini” ma’lum qilgandi. U bunda “ukrainalik millatchilarni” ayblagan va ular tinch aholi ortiga berkinayotganini ta’kidlagan. Shundan so‘ng Rossiya prezidentining matbuot kotibi Dmitriy Peskov hech kim harbiy harakatlarni “ikki kunda” tugatishni rejalashtirmaganini aytgan.
6-aprel kuni Peskov Fransiyaning LCI telekanaliga bergan intervyusida Moskva Ukrainadagi harbiy operatsiyani muzokaralar orqali hal etishni xohlayotganini ma’lum qilgan. Ertasi kuni Britaniyaning Sky News kanaliga esa Kreml vakili rossiyalik harbiylar tez kunlarda operatsiya maqsadiga erishishlarini bildirgan.
Rossiya Mudofaa vazirligi 15-aprel kuni harbiy operatsiya davom etishi va Ukraina poytaxtidagi tumanlarga “Kalibr” qanotli raketalari bilan zarbalar amalga oshirilganini ma’lum qilgan.
Izoh (0)