Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov Telegram ma’muriyati bilan muzokaralar orqali “Qora mergan” va “Snayper bloger” nomli kanallar bloklanganini ma’lum qildi.
“‘Qora mergan’ degan bir jirkanch Telegram-kanal bo‘lar edi. U asosan faollar, bloger va jurnalistlar hamda meni xoinlikda doim ayblar, barcha liberal qarashli jurnalistlarni AQSHga ishlaydigan xoinlar yoki rangli inqilob qiluvchi guruhlar degan uydirma va iflos yorliqlarni yopishtirmoqchi bo‘lar edi. Bugun ushbu kanal bloklandi”, — deb yozadi Allamjov.
Buning uchun u Google, Apple kompaniyalariga va shaxsan Pavel Durovga minnatdorchilik bildirgan.
“O‘ziga ma’qul bo‘lmagan odamlarni yo‘q qilish maqsadida tuhmat qilish, obro‘sizlantirish, xullas ifloslik uchun ajratilgan yana bir resurs endi yo‘q. Albatta, yangisi ochilishi mumkin, lekin uning ham umri qisqa bo‘lishi aniq. Chunki o‘zini hurmat qilgan resurslarda noqonuniy harakatlarga doim barham beriladi. Hayot kurashdan iborat va qalbi toza va ko‘nglida kiri yo‘qlar g‘olib bo‘laveradi, inshaalloh”, — deydi Allamjonov.
“Tozalash ishlari davom etadi. Agar yangisi ochilsa, uni ham tozalaymiz. Kurash sog‘lom bo‘lishi kerak! Iflosliklar charchatdi”, — deya ta’kidlaydi Allamjonov.
Eslatib o‘tamiz, “Qora mergan” kanali bundan oldin “Daryo.uz” va “Kun.uz” nashrlarini AQSH Xavfsizlik xizmati foydasiga ishlashda ayblagan edi. Shuningdek, u ikkala elektron axborot nashrini ham Komil Allamjonov nazorat qilishini ta’kidlagan.
Izoh (0)