Toshkentda xalqaro animatsion filmlar forumi o‘tkaziladi

18—22-aprel kunlari Toshkentda Tashkent International Animation Forum (TIAF) bo‘lib o‘tadi. Bu haqda Kinematografiya agentligi axborot xizmati xabar berdi.

Animatsion forum Kinematografiya agentligi tashabbusi bilan Shveysariya va Isroilning O‘zbekistondagi elchixonalari, Toshkentdagi Gyote instituti, Bazelevs kinokompaniyasi, Milliy kinematografiyani rivojlantirish markazi, O‘zbekiston Milliy kinofondi hamda DRF community independent filmmakers of Uzbekistan kinostudiyasi hamkorligida tashkil etiladi.

Unda Germaniya, Gruziya, Isroil, Ozarbayjon, Tojikiston, Rossiya, Ukraina, Chexiya, Qozog‘iston va Qirg‘iziston davlatlaridan animatsiya mutaxassislari, shu bilan bir qatorda o‘zbek animatorlari va “Aqlvoy”, “Bolajon” telekanallaridan vakillar ishtirok etadi.

Forum doirasida mohir animatorlar tomonidan taqdimotlar, mahorat darslari, master-klaslar, ijodiy uchrashuvlar va shu kabi qator tadbirlar o‘tkaziladi. Jumladan, o‘nga yaqin davlatdan tashrif buyurgan animatsiya sohasida faoliyat yuritayotgan mutaxassislar tomonidan seminar-treninglar bo‘lib o‘tadi.

Forumning e’tiborli jihati, unda chet eldan etalon negativlari qaytarilgan o‘zbek multfilmlari ilk bor keng jamoatchilikka namoyish etiladi. Shuningdek, “Yoshlik” studiyasining “Zumrasha” hajviy jurnali yangi soni taqdimoti hamda xorij animatorlari tomonidan yaratilgan eng yaxshi multfilmlar kichik tomoshabinlar e’tiboriga taqdim qilinadi. Ushbu forum doirasida viloyatlar bo‘ylab ham tadbirlar tashkil etiladi. Bolajonlar uchun turli xil mavzularda multfilmlar namoyish etilishi bilan birga, master-klasslar o‘tkaziladi.

Bundan tashqari, bolalarga pedagoglar va professional animatorlar bilan muloqot qilish va tajriba almashish imkoniyati taqdim qilinadi. Ular uchun O‘zbekiston animatsiya studiyalari assotsiatsiyasi, White Line, Astir animation studio, Futurist studio, Dip animation studio hamda xorij animatsiya studiyalarining ishlari namoyish etiladi. Yana, shuningdek, forum doirasida o‘smirlar uchun yosh ijodkorlar tomonidan yaratilgan filmlar taqdimoti o‘tkaziladi.