«Қўлингизда қоғоз полис бўлса, ‘права’ни олиб юришингиз керак» — ҳайдовчилик гувоҳномаси қандай ҳолларда талаб этилиши маълум қилинди

Янгиланган йўл ҳаракати қоидаларида ҳайдовчининг ёнида биометрик паспорт ёки ID-карта бўлса, ундан «права» ва бошқа ҳужжатлар талаб этилмаслиги, Йўл-патруль хизмати ходими унинг бошқа ҳужжатларини планшет орқали текшириши белгиланган. Лекин баъзи ҳолларда планшет орқали изланган маълумотлар топилмай қолмоқда. Бунинг сабаби ҳақида 15 апрель куни бўлиб ўтган давра суҳбатида ИИВ ЖХД ЙҲХХ бошлиғи ўринбосари Эрали Бозоров маълумот берди, дея хабар қилмоқда «Дарё» мухбири.

Эрали Бозоровнинг айтишича, транспорт воситалари эгаларининг фуқаролик жавобгарлигини мажбурий суғурта қилиш бўйича суғурта полиси планшет орқали текширилганда топилмаса, ҳужжат ахборот тизимига киритилмаган бўлади.

«2022 йил 1 апрелдан бошлаб ҳайдовчи ёнида ID-карта ёки биометрик паспорти бўлса, таъкидлаб ўтилган ҳужжатларни олиб юриши шарт эмас, улар тизим орқали текширилади. Аммо айрим суғурта полислари 1 апрелга қадар базага киритилмаган. Суғурта компанияларида полис тизими ишлаб чиқилган. Лекин бунга қадар полислар қоғоз шаклида бўлган. Қоғоз шаклидаги суғурта полислари ахборот тизимига киритилмагани учун тушунмовчилик бўлмасин деб, йўл ҳаракати қоидаларига ушбу банд киритилган.

Масалан, қўлимда ID-карта бор. Лекин суғурта полиси ўтган йили май ойида бир йилга берилиб, тизимга киритилмаган бўлса, планшетда кўринмайди. Шунинг учун фуқаролар сарсонгарчилигининг олдини олиш мақсадида қавс ичида кўрсатиб кетилди. Суғурта полислари тизимга тўлиқ киритилгандан кейин бу каби муаммолар бўлмайди. Агар қўлингизда қоғоз суғурта полиси бўлса, ‘права’ни олиб юришингиз керак. E-polis тизимига суғурта полисингиз киритилган бўлса, унда олиб юриш шарт бўлмайди. Агар буни киритмасак, тушунмовчиликлар юзага келиши мумкин. Чунки мен тизимда текшириб кўраман, унда бўлмайди, қўлидагини кўрсатса, биз уни тан олмаслигимиз мумкин. Шундай ҳолатларнинг олдини олиш мақсадида банд киритиб кетилди», — деди ташкилот расмийси.

Аввалроқ янги тартибдаги йўл ҳаракати қоидаларига асосан ҳайдовчиларга меъёридан ортиқ баландликда мусиқа тинглаш ва сигнал чалиш тақиқлангани хабар қилинганди. Шунингдек, автомобиль олд ўриндиғида ўтириб хавфсизлик камарини тақмаган йўловчи жаримага тортилиши мумкинлиги айтилган.