O‘zbekistonda ko‘p yillar davomida islomiy ilm-ma’rifat taratib kelayotgan e’tiborli ulamolardan Nasriddinxon Atoyev 15-aprel kuni 64 yoshida vafot etdi, deb xabar beradi O‘zA.
Xalqimizda Eshonbobo nomi bilan mashhur bo‘lgan Nasriddinxon 1958-yil 15-may kuni Navoiy viloyati Nurota tumanida tug‘ildi. Bolaligidan boshlab imon-e’tiqodli oilada tarbiya topib, diniy ilmlarni chuqur o‘rgangan Nasriddinxon Atoyev mamlakatimiz mustaqillikka erishganidan so‘ng o‘z hayotini diniy qadriyatlarimizni tiklash va targ‘ib etishga bag‘ishlab, bu sohada alohida jonbozlik ko‘rsatdi.Oliy diniy bilim olish maqsadida Toshkent islom institutiga o‘qishga kirdi va 1996-yili muvaffaqiyatli tamomladi.
Nasriddinxon eshonboboning umri ham ilm va hikmatda o‘tdi. Ilm va ezgulikka baxshida bo‘lgan hayot asrlarga tatiydi. Chunki bu inson odamlarga yaxshilik ulashish, muqaddas ziyoratgohlarni obod etish, Navoiy xalqining ma’rifati yo‘lida fidokorona mehnat qildi. Zero, Payg‘ambar alayhissalom ham “Sizlarning yaxshilaringiz umri uzoq bo‘lib, amallari yaxshi bo‘lganingizdir”, deb aytganlar.
Nasriddinxon Atoyev muqaddas dinimiz asoslarini, arab va fors tillarini chuqur egallab, 1992—2003-yillarda Navoiy viloyati Nurota tumani “Chil ustun” masjidida imom-xatib, 2003—2010-yillarda viloyat bosh imom-xatibi, 2010-yildan buyon viloyat faxriy imomi, shuningdek, Navoiy viloyati “Chashma” tabiiy-me’moriy majmuasiga mehr qo‘yib, 2018-yildan Navoiy viloyati direksiyasi direktori vazifasida faoliyat yuritib kelayotgan edi.
Nasriddinxon eshonbobo hayoti davomida 60 nafardan ortiq shogirdlar yetishtirgan bo‘lib, ularni haqiqiy vatanparvar sifatida jamiyatda o‘z o‘rnini topishlariga alohida e’tibor qaratib keldi.
Diniy bilim va tafakkurining kengligi, ona yurtimizga, istiqlol g‘oyalariga sadoqati, jamoat ishlari, ayniqsa, ma’naviy-ma’rifiy targ‘ibot sohasidagi fidoyiligi bilan ko‘pchilikka ibrat va namuna bo‘lgan Nasriddinxon eshonbobo so‘nggi yillarda diniy va milliy qadriyatlarimizni asrab-avaylashga, ziyoratgohlarimizni obod qilishga katta e’tibor qaratish bilan birga, hududdagi aholi o‘rtasida diniy-ma’rifiy ishlar samaradorligini oshirishda alohida faollik ko‘rsatdi.
Darhaqiqat, buyuk allomalarimizning diniy e’tiqod borasidagi ezgu an’analariga sadoqat bilan butun hayotini muqaddas dinimiz sofligini saqlash va rivojiga bag‘ishlagan Nasriddinxon Atoyev mamlakatimiz jamoatchiligi o‘rtasida obro‘-e’tibor qozongan edi.
Nasriddin Atoyevning taqvodorligi, go‘zal xulqi, shogirdlari va safdoshlariga nisbatan samimiy muomalasi, xolis nasihati barchaning qalbida chuqur iz qoldirdi.
Taniqli ulamo, yoshlarning mehribon ustozi, kamtarin inson qalblarimizda hamisha saqlanib qoladi.
Ushbu musibat damlarida marhumning ahli oilasi, yaqinlariga sabr tilaymiz va chin dildan hamdardlik bildiramiz.
Inna lillahi va inna ilayhi roji’un!
O‘zbekiston musulmonlari idorasi Ulamolar kengashi hamda Din ishlari bo‘yicha qo‘mita jamoasi
Izoh (0)