Samarqandda gaz balloni chaqnashi oqibatida kuygan er-xotin va ularning 10 yoshli qizi vafot etdi

Samarqand viloyatining Bulung‘ur tumanida gaz balloni chaqnashidan kuyish tan jarohatini olgan er-xotin va ularning 10 yoshli qizi vafot etdi. Bu haqda Bulung‘ur tuman tibbiyot birlashmasi shifokoriga tayanib, “Daryo” muxbiri xabar berdi.

Kecha, 15-aprel kuni chaqnashdan 90 foiz kuygan ona va qizi vafot etgan bo‘lsa, bugun oila boshi olamdan o‘tgan.

Avvalroq Bulung‘urdagi xonadonlarning birida nosozligi aytilgan gaz ballonida chaqnash sodir bo‘lgani, oqibatda bir oilaning uch nafar a’zosi kuyish tan jarohatini olib, shifoxonaga yotqizilgani haqida xabar berilgandi.

Mazkur fojia haqida “Daryo” muxbiriga gapirib bergan marhumning ukasi Jamol Narzullayev: “‘Tumangaz’dan odam kelib bu gaz ballon bizniki emas deb, tan olmay ketgan. Shunga jahlim chiqyapti. Bozordan sotib olganimiz yo‘q. Biz ikkita gaz ballon olganmiz. Ularning hujjatlari ham bo‘lishi kerak. Gaz ballon chiqaradigan zavodimiz bo‘lmasa, uni yasab bo‘lmasa, qanday uni tan olmasligi mumkin? Har ikki oyda uni ko‘rikdan o‘tkazish muddati bo‘ladi. Buni tekshirib ko‘rganda raqamlari bor ekan va uning yaroqlilik muddati o‘tib ketgan ekan”, — degandi.

Mazkur ayblovga javob bergan “Bulung‘urtumangaz”ning suyultirilgan gaz ta’minoti bo‘limi boshlig‘i Mirzohid Hakimov esa chaqnash sodir bo‘lgan gaz balloni ularga tegishli emasligini aytib, “O‘rganganimizda texnika xavfsizlik qoidalari qo‘pol ravishda buzilganligi, gaz ballon bizga tegishli emasligi, uning jo‘mragiga simdan yasama ochish uskunalari yasab qo‘yilgani ma’lum bo‘ldi”, — degandi.

Keyinchalik Samarqand viloyat IIB holat yuzasidan jinoyat ishi qo‘zg‘atilib, tergov surishtiruv jarayonlari boshlanganini ma’lum qilgandi.