Toshkent viloyati Chinoz tumanida joylashgan “Yallama” chegara bojxona postiga tutash hududda yangi bojxona terminali ishga tushirildi. Bu haqda 16-aprel kuni inshoot ochilishiga bag‘ishlangan tadbirda ma’lum qilindi, deya xabar bermoqda “Daryo” muxbiri.
Tadbirda 20 gektar maydonni egallagan “Yallama” bojxona terminalida bojxona, bank, logistika, tezkor laboratoriya, fitosanitar, veterinar, sanitar-epidemiologik, ekologik, muvofiqlikni baholash xizmatlari ko‘rsatilishi aytildi.
Davlat bojxona qo‘mitasi raisining birinchi o‘rinbosari Ilhom Muxtorovning ta’kidlashicha, yangi terminal tovarlarni chegara orqali eksport-import qilishda katta qulaylik yaratadi.
“Yallama” respublikamizdagi eng yirik avtomobil o‘tkazish punkti hisoblanadi. Bunaqa terminallar dunyo amaliyotida mavjud bo‘lib, ularni yuklarni vaqtincha saqlash omborlari deb atashadi. Tasavvur qiling, chet eldan Toshkent shahriga qancha miqdorda yuk kirib keladi. Shu yerdan barcha yuklarni erkin muomalaga chiqarish imkoni paydo bo‘ldi. Ya’ni terminalning o‘zida tovarlar to‘liq davlat nazoratidan o‘tkazilib, tez fursatda O‘zbekistonning istalgan hududiga yuklarni olib ketish mumkin bo‘ladi. Endi bojxona rasmiylashtiruvini yarim yoki bir soat ichida amalga oshirish imkoniyati bor. Bu kabi terminaldan respublikamizning turli hududlarda yana uchta ochilishi rejalashtirilgan” — dedi Ilhom Muxtorov.
Qo‘mita bosh boshqarmasi boshlig‘i Rustam Qobulov terminalning qulayliklari haqida gapirdi.
“Bu bojxona postidan asosan, Yevropa, Xitoy, Rossiya va Qozog‘istondan kelgan yuklar kirib-chiqadi. Terminal yuklarni ortish, tushirish va saqlash uchun qurildi. Hududda ma’muriy bino ham bo‘lib, barcha davlat xizmatlari bir joyda ko‘rsatiladi. Tadbirkor bitta joyga kelib hujjat topshiradi, shu yerning o‘zida yukini bojxona rasmiylashtiruvidan o‘tkazadi va to‘g‘ri bozor yoki o‘zining korxonasiga olib ketadi” — dedi tashkilot rasmiysi.
Davlat bojxona qo‘mitasi bo‘lim boshlig‘i A’zamjon Ergashevning aytishicha, oldinlari chegarada hujjatlar rasmiylashtirish tadbirkorlarning ko‘p vaqtini olardi. Yangi terminalning ishga tushishi ushbu muammoga yechim bo‘ldi.
“Avvallari import tovarlarni rasmiylashtirish muddati 3 kungacha cho‘zilardi. Jarayonni bevosita terminal orqali amalga oshirilsa, sarflanadigan vaqt 1 kungacha qisqaradi. Eksportga esa 16 soatdan ortiq vaqt ketardi. Terminal ombori chegaraga tutash hududda bo‘lgani uchun bu vaqt ham 5 barobarga qisqarib, hujjatlarni rasmiylashtirishga 3 soat kifoya qiladi. Bundan tashqari, tadbirkorlar xarajatlari ham kamayadi. Chunki bir joydan turib barcha hujjat ishlarini bitirish qulay. Qolaversa, bu yerda amalga oshirilgan ko‘rik hamma joyda tan olinadi. Mazkur bojxona postida bir kunda o‘rtacha 400 ta avtotransport vositasi harakatlanadi. Lekin bu imkoniyatni 1000 tagacha kengaytirish mumkin” — dedi qo‘mita vakili.
“Yallama” bojxona terminali “Euroasia transportation logistics” xorijiy korxonasi tomonidan qurilgan. Korxona vakili Raufjon Hakimov jurnalistlarga bergan intervyusida inshoot qurilishi uchun katta miqdorda investitsiya kiritilganini aytdi.
“Bizning kompaniya logistika xizmatlari ko‘rsatadi. “Yallama” bojxona terminali kompaniyamiz va Davlat bojxona qo‘mitasi bilan birgalikda, davlat xususiy sherikchiligi asosida qurildi. Hozirda terminalning birinchi bosqichi yakunlangan. Ayni paytgacha qurilishga 10 million dollardan ziyod mablag‘ sarflandi. Loyihaning umumiy qiymati esa 16 million dollardan oshadi. Terminalga 240-300 ishchi o‘rni ajratilgan”, — dedi u.
Ma’lum qilinishicha, yangi terminal bir vaqtning o‘zida 500 ta yuk avtomobilini sig‘dirish imkoniyatiga ega. Hududda bepul WiFi, avtoturargoh, 5 ming kvadrat metr maydonda yopiq hamda 3 ming 836 kvadrat metr maydonda ochiq bojxona omborlari, rasmiylashtiruv zali, davlat nazorati organlari uchun xizmat xonalari, savdo do‘konlari hamda boshqa bino va inshootlar ham qurilgan.
Izoh (0)