Журналист Хайрулла Нуриддинов «Ўзбекистон 24» телеканалида эфирга узатилган «Менимча» кўрсатувида «Соғлом турмуш тарзи» платформаси ҳақида фикр билдирди.
Унинг айтишича, пандемия пайтида одамларимизнинг ёндош касалликлари кўп ва ўзбилармонлик билан дори-дармон қилишга ўрганган.
Бу кўпчиликнинг аҳволини танг қилиб қўйгани маълум. Ўзимизни ўзимиз даволашга, шифокор айтмаса ҳам қанақадир дорини сотиб олиб ичишга, осма укол олишга муккасидан кетганмиз. Чунки, бу ўзимизни яхши ҳис қилишнинг осон йўли. Соғлом бўлиш учун парҳез қилиш, вазнни мувозанатда сақлаш, спорт билан шуғулланиш ёқмайди-да бизга.Яна битта масала эсимга тушди: ўтган йили ҳар куни 10 минг қадам юрган одамга 3 минг сўмдан мукофот бериладиган «Соғлом турмуш тарзи» платформаси ишга тушганди. Тонгда ва кечки таомдан сўнг пиёда юрувчилар кўпайиб қолганди. Кейинчалик бу платформа такомиллаштирилиши, бунинг учун давлат бюджетидан 100 миллиард сўм ажратилиши, шу йилнинг 1 мартидан ҳар ҳафта 100 миллионли пул ва ютуқли ўйинлар ташкил қилиниши айтилди-ю, аммо тинчиб кетди. Мана, апрель ойи ҳам ярмидан ўтди, лекин лойиҳа ҳақида шу пайтгача янгилик йўқ. Албатта, соғлом ва фаол бўлишни истаган одамга лойиҳанинг ишламаётгани баҳона бўлолмайди-ю, аммо тегишли мутасадди ташкилотлар шу лойиҳани тезроқ йўлга қўйса, майли-да, пиёда юрадиганларнинг сони яна кўпайиб қолармиди, менимча.
Асосий мавзуга қайтадиган бўлсам, албатта, дори-дармонсиз тузалмайдиган касалликлар кўп. Одамлар дорихонага узун рўйхат билан кириб, чўнтакни бўшатиб чиқиб кетади. Давлат раҳбари айтгандек, бемори бор оила ойлигининг 60 фоизини дори-дармонга ишлатяпти. Одамнинг жони оғриб турса, кўзига пул кўринмайди, албатта.
Хайрулла Нуриддинов
Эслатиб ўтамиз, 2020 йил 30 октябрь куни президент Шавкат Мирзиёевнинг «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида»ги фармони қабул қилинди.
Унга мувофиқ, аҳоли орасида кунлик юриш ва югуришни оммалаштириш мақсадида «Соғлом турмуш тарзи» — «1hls.uz» платформаси яратилиши ва 2021 йилнинг 1 март санасидан бошлаб ишга туширилиши белгиланган. Бироқ платформа 2021 йилнинг июнь ойида тест режимида амалиётга татбиқ этилган. 2022 йил 16 январдан бошлаб эса 3 минг сўм пул маблағ бериш тизими тўхтатилди. Таъкидланишича, мутахассислар ва жамоатчилик таклифларига асосан, аҳолини янада кўпроқ кунлик юриш ва югуришга жалб қилиш мақсадида рағбатлантириш тизимини ўзгартириш, 3 минг сўм ўрнига каттароқ совринлар қўйиш мақсадга мувофиқ, деган хулосага келинган. Шунга кўра, «1hls.uz» платформаси орқали қатор ўзгаришлар амалга оширилади.
Изоҳ (0)