Тошкент вилояти Чиноз туманида жойлашган «Яллама» чегара божхона постига туташ ҳудудда янги божхона терминали ишга туширилди. Бу ҳақда 16 апрель куни иншоот очилишига бағишланган тадбирда маълум қилинди, дея хабар бермоқда «Дарё» мухбири.
Тадбирда 20 гектар майдонни эгаллаган «Яллама» божхона терминалида божхона, банк, логистика, тезкор лаборатория, фитосанитар, ветеринар, санитар-эпидемиологик, экологик, мувофиқликни баҳолаш хизматлари кўрсатилиши айтилди.
Давлат божхона қўмитаси раисининг биринчи ўринбосари Илҳом Мухторовнинг таъкидлашича, янги терминал товарларни чегара орқали экспорт-импорт қилишда катта қулайлик яратади.
«Яллама» республикамиздаги энг йирик автомобиль ўтказиш пункти ҳисобланади. Бунақа терминаллар дунё амалиётида мавжуд бўлиб, уларни юкларни вақтинча сақлаш омборлари деб аташади. Тасаввур қилинг, чет элдан Тошкент шаҳрига қанча миқдорда юк кириб келади. Шу ердан барча юкларни эркин муомалага чиқариш имкони пайдо бўлди. Яъни терминалнинг ўзида товарлар тўлиқ давлат назоратидан ўтказилиб, тез фурсатда Ўзбекистоннинг исталган ҳудудига юкларни олиб кетиш мумкин бўлади. Энди божхона расмийлаштирувини ярим ёки бир соат ичида амалга ошириш имконияти бор. Бу каби терминалдан республикамизнинг турли ҳудудларда яна учта очилиши режалаштирилган» — деди Илҳом Мухторов.
Қўмита бош бошқармаси бошлиғи Рустам Қобулов терминалнинг қулайликлари ҳақида гапирди.
«Бу божхона постидан асосан, Европа, Хитой, Россия ва Қозоғистондан келган юклар кириб-чиқади. Терминал юкларни ортиш, тушириш ва сақлаш учун қурилди. Ҳудудда маъмурий бино ҳам бўлиб, барча давлат хизматлари бир жойда кўрсатилади. Тадбиркор битта жойга келиб ҳужжат топширади, шу ернинг ўзида юкини божхона расмийлаштирувидан ўтказади ва тўғри бозор ёки ўзининг корхонасига олиб кетади» — деди ташкилот расмийси.
Давлат божхона қўмитаси бўлим бошлиғи Аъзамжон Эргашевнинг айтишича, олдинлари чегарада ҳужжатлар расмийлаштириш тадбиркорларнинг кўп вақтини оларди. Янги терминалнинг ишга тушиши ушбу муаммога ечим бўлди.
«Авваллари импорт товарларни расмийлаштириш муддати 3 кунгача чўзиларди. Жараённи бевосита терминал орқали амалга оширилса, сарфланадиган вақт 1 кунгача қисқаради. Экспортга эса 16 соатдан ортиқ вақт кетарди. Терминал омбори чегарага туташ ҳудудда бўлгани учун бу вақт ҳам 5 баробарга қисқариб, ҳужжатларни расмийлаштиришга 3 соат кифоя қилади. Бундан ташқари, тадбиркорлар харажатлари ҳам камаяди. Чунки бир жойдан туриб барча ҳужжат ишларини битириш қулай. Қолаверса, бу ерда амалга оширилган кўрик ҳамма жойда тан олинади. Мазкур божхона постида бир кунда ўртача 400 та автотранспорт воситаси ҳаракатланади. Лекин бу имкониятни 1000 тагача кенгайтириш мумкин» — деди қўмита вакили.
«Яллама» божхона терминали «Euroasia транспортатион логистиcс» хорижий корхонаси томонидан қурилган. Корхона вакили Рауфжон Ҳакимов журналистларга берган интервьюсида иншоот қурилиши учун катта миқдорда инвестиция киритилганини айтди.
«Бизнинг компания логистика хизматлари кўрсатади. «Яллама» божхона терминали компаниямиз ва Давлат божхона қўмитаси билан биргаликда, давлат хусусий шерикчилиги асосида қурилди. Ҳозирда терминалнинг биринчи босқичи якунланган. Айни пайтгача қурилишга 10 миллион доллардан зиёд маблағ сарфланди. Лойиҳанинг умумий қиймати эса 16 миллион доллардан ошади. Терминалга 240-300 ишчи ўрни ажратилган», — деди у.
Маълум қилинишича, янги терминал бир вақтнинг ўзида 500 та юк автомобилини сиғдириш имкониятига эга. Ҳудудда бепул WиФи, автотураргоҳ, 5 минг квадрат метр майдонда ёпиқ ҳамда 3 минг 836 квадрат метр майдонда очиқ божхона омборлари, расмийлаштирув зали, давлат назорати органлари учун хизмат хоналари, савдо дўконлари ҳамда бошқа бино ва иншоотлар ҳам қурилган.
Изоҳ (0)