Shavkat Mirziyoyev 15-aprel kuni o‘tkazilgan videoselektor yig‘ilishda xizmatlar sohasiga doir qator vazifalar topshirdi. Bu haqda prezident matbuot kotibi xabar qildi.
Qayd etilishicha, xizmatlar sohasida avval ajratilib, qaytarilgan 360 milliard so‘m resurslardan bugungi kunga qadar atigi 9 milliard so‘mi (yoki 3 foizi) yangi loyihalariga yo‘naltirilgan. Xizmatlarni rivojlantirish uchun banklarga joylashtirilgan resurslar bo‘yicha avvalgi foiz (10 foiz) stavkalarini o‘zgarishsiz qoldirish topshirilgan. Tadbirkorlik jamg‘armasining tadbirkorlarga kompensatsiya to‘lovlarini kengaytirish uchun jamg‘armaga 400 milliard so‘m, keyinchalik yana 500 milliard so‘m yo‘naltirish vazifasi qo‘yilgan.
Bundan tashqari, xizmatlar sohasi uchun Milliy bank tomonidan jalb qilingan 200 million dollar hisobidan tadbirkorlarga 5 milliard so‘mgacha kreditlar ajratiladi. Bunda kredit stavkasi Tadbirkorlik jamg‘armasi kompensatsiyasi bilan 18 foizdan oshmaydi.
1-dekabrga qadar yuqorida qayd etilgan mablag‘lar tadbirkorlarga to‘liq berilishi shartligi belgilangan.
Shuningdek, viloyatlarda kichik va o‘rta biznes loyihalarini moliyalashtirish uchun tijorat banklariga 300 million dollar resurs beriladi. Ushbu mablag‘lar eng yaxshi shartlarda tadbirkorlik loyihalarini moliyalashtirish taklifi bilan chiqqan davlat va xususiy banklarga 7 yil muddatga 10 foiz stavkada milliy valyuta – so‘mda joylashtiriladi. Keyinchalik ushbu kreditlar tadbirkorlarning tajribasi, ularning oldingi natijalariga qarab 5 milliard so‘mgacha, kredit stavkasini 14 foizdan oshirmagan holda beriladi.
Bundan tashqari, nobank moliya tashkilotlari bo‘yicha yangi qonun kichik va o‘rta biznes loyihalarini moliyalashtirish bo‘yicha katta imkoniyatlar eshigini ochishi alohida ta’kidlangan.
Izoh (0)