Shavkat Mirziyoyev raisligida 15-aprel kuni o‘tkazilgan yig‘ilishda murakkab vaziyatda biznes va tadbirkorlikni yanada qo‘llab-quvvatlash bo‘yicha qo‘shimcha choralar ko‘rib chiqildi. Bu haqda prezident matbuot kotibi xabar qildi.
“Ochiq aytish kerak, tadbirkorlarni qo‘llab-quvvatlash, ularga shart-sharoitlar yaratish borasida hamma tuman va shaharlardagi ahvolni birdek qoniqarli deb bo‘lmaydi”, — deydi prezident.
2022-yil 1-chorakda ayrim hududlarda tadbirkorlik faolligi pasaygan. Respublika bo‘yicha joriy yilda 5,5 mingta korxona o‘z faoliyatini tugatgan. Bu ko‘rsatkich Namangan, Samarqand, Qashqadaryo, Xorazm, Qoraqalpog‘iston va Toshkent viloyatida nisbatan yuqori.
Hududlarda o‘tkazilgan uchrashuvlarda tadbirkorlar tomonidan mingdan ortiq muammo ko‘tarilgan. Ularning asosiy qismi kredit olish, soliq ma’murchiligi, yer ajratish, elektr, gaz va suvga ulanish bilan bog‘liq.
“Yagona darcha”ga o‘tgan yili elektr, gaz va suv hamda boshqa muhandislik-kommunikatsiya tarmoqlariga ulanish bo‘yicha tadbirkorlarning 70 mingdan ortiq, 2022 yil 1-chorakda esa 10 mingga yaqin murojaatlari o‘z vaqtida hal etilmagani tanqid qilingan.
Izoh (0)