Checheniston rahbari Ramzan Qodirov Rossiya Qurolli kuchlari Ukrainaning barcha shaharlariga hujum uyushtirishini va’da qildi. Bu haqda u o‘zining Telegram’dagi kanaliga joylashtirgan videomurojaatida qayd etgan.
Uning so‘zlariga ko‘ra, Rossiya Qurolli kuchlari shaharlar, qishloq va boshqa aholi punktlariga hujumlarni uyushtirish orqali, ularni “natsistlar” va “banderachilar”dan ozod etishni rejalashtirmoqda.
“Vazifa aniq va allaqachon ushbu yo‘nalish bo‘yicha ishlay boshlaganmiz, hujumlar to‘lqini nafaqat Mariupol, balki boshqa barcha aholi punktlari, shahar va qishloqlarda ham bo‘ladi. Ammo birinchi navbatda Lugansk va Donetskni to‘liq ozod etamiz, bu kabi vazifa oliy bosh qo‘mondon, prezident Vladimir Putin tomonidan qo‘yilgan”, — deydi Qodirov.
Shuningdek, u “Kiyevdan ketishgan bo‘lsa, demak, Rossiya Ukrainaga yon bosyapti” degan iddaolarga javob qaytargan. “Sizlarni ishontirib aytamanki, Kiyev bizning oliy bosh qo‘mondonimiz taqdim etgan majburiyatlarni bajarmasa, urush to‘xtamaydi. Biz ularni yakson etib bo‘ldik, hatto tiriklari ham ma’nan o‘ldi”, — deydi Checheniston yetakchisi.
Avvalroq Ramzan Qodirov Mariupoldagi asosiy vazifalar deyarli yakunlangani aytgandi. Uning so‘zlariga ko‘ra, “Bandera izdoshlaridan bir nechtasi qolgan”, bu borada ish olib borilmoqda va yakunlanadi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)