Shimoliy Koreyada Kim Chen In hukmronligining 10 yilligi nishonlanmoqda. Shu munosabat bilan milliy yig‘ilishda Kimning yangi portreti taqdim etildi. Mamlakatda bir hafta davomida rejimning kuchini namoyish etishga qaratilgan qator tadbirlar o‘tkaziladi.
Koreya ishchilar partiyasi Markaziy qo‘mitasining Siyosiy byurosi prezidiumi a’zosi va Kim davridagi eng yuqori lavozimli amaldorlardan biri bo‘lgan Choy Ryon Xe yig‘ilishda so‘zlagan nutqida Shimoliy Koreya rahbari “nihoyat mamlakatning yadroviy energetika dasturini yakunlashdek tarixiy maqsadiga erishganini” aytdi.
Kim 2011-yil dekabr oyida otasi Kim Chen Ir vafot etganidan keyin hokimiyat tepasiga kelgan. 2012-yil 11-aprel kuni yosh Kim oliy partiya va davlat rahbari etib saylandi. Amalda, Shimoliy Koreya saylovlarida har bir byulletenda faqat bitta nomzod ko‘rsatiladi, Kimlar oilasi esa butun tarixi davomida mamlakatni boshqarib kelmoqda.
2017-yilda AQSHning o‘sha paytdagi prezidenti Donald Tramp Shimoliy Koreya yetakchisini Rocketman (“Raketa odam”) deb atagan. U BMT Bosh Assambleyasidagi nutqida bu laqabni takrorlagan va keyinchalik ham Kimni shunday atashda davom etgan.
Keyinroq Tramp Kimga nima uchun bunday laqab tanlaganini izohladi: “Men sizni Rocketman deb atadim, chunki sizni xayolan xuddi otda, egar ustida o‘tirgan holda ko‘rardim, Yaponiya uzra uchayotgan raketada o‘tirganingizni tasavvur qilardim”, — dedi u.
Shimoliy Koreya 2006-yildan buyon oltita yadroviy sinov o‘tkazdi, ulardan to‘rttasi Kim Chen In davrida amalga oshirildi. Koreya yarimorolidagi keskinlik Shimoliy Koreya 26-fevral va 4-mart kunlari mamlakatda ishlab chiqilayotgan yangi qit’alararo ballistik raketa (ICBM) tizimining ikkita ballistik raketasini sinovdan o‘tkazgach hamda 24-mart kuni 2017-yildan buyon birinchi marta ICBM’ni to‘liq sinovini o‘tkazganidan so‘ng keskin kuchaydi.
Izoh (0)