Ukraina prezidenti Vladimir Zelenskiy Janubiy Koreyaga harbiy yordam so‘rab murojaat qildi. Davlat rahbari Janubiy Koreya parlamentida videoaloqa orqali so‘zga chiqib, bir qancha qurol-yarog‘ so‘ragan.
“Bizga havo hujumidan mudofaa tizimlari kerak, samolyotlar, tanklar, boshqa zirhli texnikalar, artilleriya tizimlari va o‘q-dorilar kerak. Sizda esa bizga zarur narsalar bor”, — dedi u.
Avvalroq Janubiy Koreya mudofaa vaziri So Uk Ukrainaga qurol yetkazib berish imkoniyatini rad etgan edi. Bungacha Janubiy Koreya Tashqi ishlar vazirligi rahbari Chon Iy Yen Seul Kiyevga 30 million dollarlik gumanitar yordam yetkazishni va uning umumiy miqdorini 40 million dollarga oshirishni rejalashtirayotganini ma’lum qilgandi.
Shuningdek, o‘z nutqida Zelenskiy Rossiya qo‘shinlari egallashga urinayotgan Mariupolda urush paytida o‘n minglab odamlar halok bo‘lganini aytdi. U Rossiya yangi hujum uchun o‘n minglab qo‘shin yig‘ayotganini qo‘shimcha qildi. Gap Rossiyaning Donbassdagi hujumi haqida ketayotgan bo‘lishi mumkin.
Mart oyi boshida rus qo‘shinlari Mariupolni qamal qilishni boshladi. Oyning o‘rtalaridayoq shahar hokimiyati hududning 80-90 foizi vayron bo‘lganini va minglab qurbonlar borligini bildirgan.
7-aprel kuni Mariupol meri Vadim Boychenko shaharda kamida 5 ming kishi halok bo‘lganini aytdi. Urushdan oldin Mariupol aholisi taxminan 430 ming kishi edi. Shahar meri Vadim Boychenkoga ko‘ra, aprel oyi boshida shaharda 100 mingga yaqin odam qolgan.
Mavzuga doir:
- AQSh Senati Ukrainaga lend-liz dasturi bilan qurol yetkazib berish haqidagi qonun loyihasini ma’qulladi. Ushbu qonundan Ikkinchi Jahon urushi paytida foydalanilgan
- Estoniya Ukrainaga gaubitsa, tankka qarshi raketa, mina va dronlar partiyasini yetkazib berdi
- “Agar Ukraina NATO tarkibida bo‘lganida urush bo‘lmasdi” — Zelenskiy
Izoh (0)