2022-yilning mart oyida so‘mning real samarali almashuv kursi yanvar oyiga nisbatan qariyb 4 foizga qadrsizlandi. Bu haqda Markaziy bank sharhidan ma’lum bo‘ldi.
Real samarali almashuv kursi tashqi savdo aylanmasi, inflyatsiya darajasi va asosiy savdo hamkorlarining valyuta kurslaridagi o‘zgarishlarni hisobga olgan holda milliy valyuta o‘zgarishidagi mavjud vaziyatni aks ettiruvchi makroiqtisodiy ko‘rsatkichdir.
Savdo-hamkor davlatlar inflyatsiya darajasi va milliy valyuta kursining so‘nggi oyda yuqori darajada shakllanganligi real samarali almashuv kursining qadrsizlanishiga sezilarli hissa qo‘shdi.
Ayrim asosiy savdo-hamkor davlatlarning valyutalari kursi mart oyi davomida AQSH dollariga nisbatan sezilarli darajada pasaydi, — deyiladi Markaziy bank sharhida.Rossiya rubli mart oyida 6 foizga (87 dan 81,8 ga) mustahkamlandi. Rubl kursi G‘arb mamlakatlar tomonidan qo‘llanilgan qator yangi sanksiyalar fonida fevral oyining oxiridan boshlab keskin qadrsizlanishga uchragan edi.
Keyinchalik mart oyida Rossiya Markaziy banki tomonidan AQSH dollariga talabni kamaytirish uchun kiritilgan turli cheklovlar natijasida mustahkamlandi.
28-fevral kuni Rossiya Markaziy banki asosiy foiz stavkasini 9,5 foizdan 20 foizgacha ko‘tardi. Rossiya rublining fevral oyi so‘ngidagi keskin qadrsizlanishi ta’sirida Qozog‘iston tengesi mart oyida 7,9 foizga qadrsizlandi.
24-fevral kuni Qozog‘iston Markaziy banki asosiy foiz stavkani 13,5 foizgacha oshirdi. Turk lirasi ham mazkur oy davomida 7,7 foizga (13,6 dan 14,7 ga) qadrsizlandi.
Yil boshidan buyon Turkiya hukumati tomonidan milliy valyutani qo‘llab-quvvatlovchi chora-tadbirlar liraning biroz mustahkamlanishiga sabab bo‘lgan bo‘lsa-da, mintaqadagi notinch vaziyat liraga ham salbiy ta’sir ko‘rsatdi, — deydi Markaziy bank.Xitoy yuani ushbu oyda nisbatan barqaror darajada shakllandi. Xitoy kapital bozorlariga mablag‘lar oqimi ko‘payganligi hamda eksportning barqarorligi yuanning biroz mustahkamlanishiga sabab bo‘ldi.
2022-yil mart oyida asosiy savdo-hamkor davlatlarning deyarli barchasida inflyatsiya ko‘rsatkichi o‘sishda davom etdi, — deyiladi sharhda.Rossiyada oylik inflyatsiya 8 foizgacha tezlashib, yillik hisobda 17 foizni tashkil etishi prognoz qilinmoqda. Oy davomida go‘sht, yorma va sut mahsulotlari narxlari sezilarli oshdi. Shuningdek, import avtomobillari, kiyim-kechak, maishiy kimyo vositalari hamda dori-darmonlar narxi o‘sishi tezlashdi.
Qozog‘istonda oylik inflyatsiya 3,7 foizni tashkil etib, yillik hisobda 12 foizga yetdi. Oziq-ovqat mahsulotlari oylik 5,8 foizga (yillik 15,4 foizga), nooziq-ovqat mahsulotlari — 2,8 foizga (yillik 10,9 foizga) hamda xizmatlar 1,4 foizga (yillik 8,3 foizga) o‘sdi.
Turkiyada dunyoda energiya mahsulotlari narxlari oshishi fonida oylik inflyatsiya ko‘rsatkichi yuqorilab, 5,5 foizga yetdi, yillik hisobda 61,1 foizgacha oshdi. Bu so‘nggi yigirma yillikdagi eng yuqori ko‘rsatkich hisoblanadi. Shuningdek, mamlakatda ishlab chiqaruvchilar narxlari indeksi oylik hisobda 9,2 foizga o‘sib, yillik 115 foizga yetdi.
Avvalroq O‘zbekistonning qaysi viloyatlarida narxlar oshishi ko‘proq sezilgani ma’lum bo‘lgan edi.
Izoh (0)