2022 йилнинг март ойида сўмнинг реал самарали алмашув курси январь ойига нисбатан қарийб 4 фоизга қадрсизланди. Бу ҳақда Марказий банк шарҳидан маълум бўлди.
Реал самарали алмашув курси ташқи савдо айланмаси, инфляция даражаси ва асосий савдо ҳамкорларининг валюта курсларидаги ўзгаришларни ҳисобга олган ҳолда миллий валюта ўзгаришидаги мавжуд вазиятни акс эттирувчи макроиқтисодий кўрсаткичдир.
Савдо-ҳамкор давлатлар инфляция даражаси ва миллий валюта курсининг сўнгги ойда юқори даражада шаклланганлиги реал самарали алмашув курсининг қадрсизланишига сезиларли ҳисса қўшди.
Айрим асосий савдо-ҳамкор давлатларнинг валюталари курси март ойи давомида АҚШ долларига нисбатан сезиларли даражада пасайди, — дейилади Марказий банк шарҳида.Россия рубли март ойида 6 фоизга (87 дан 81,8 га) мустаҳкамланди. Рубль курси Ғарб мамлакатлар томонидан қўлланилган қатор янги санкциялар фонида февраль ойининг охиридан бошлаб кескин қадрсизланишга учраган эди.
Кейинчалик март ойида Россия Марказий банки томонидан АҚШ долларига талабни камайтириш учун киритилган турли чекловлар натижасида мустаҳкамланди.
28 февраль куни Россия Марказий банки асосий фоиз ставкасини 9,5 фоиздан 20 фоизгача кўтарди. Россия рублининг февраль ойи сўнгидаги кескин қадрсизланиши таъсирида Қозоғистон тенгеси март ойида 7,9 фоизга қадрсизланди.
24 февраль куни Қозоғистон Марказий банки асосий фоиз ставкани 13,5 фоизгача оширди. Турк лираси ҳам мазкур ой давомида 7,7 фоизга (13,6 дан 14,7 га) қадрсизланди.
Йил бошидан буён Туркия ҳукумати томонидан миллий валютани қўллаб-қувватловчи чора-тадбирлар лиранинг бироз мустаҳкамланишига сабаб бўлган бўлса-да, минтақадаги нотинч вазият лирага ҳам салбий таъсир кўрсатди, — дейди Марказий банк.Хитой юани ушбу ойда нисбатан барқарор даражада шаклланди. Хитой капитал бозорларига маблағлар оқими кўпайганлиги ҳамда экспортнинг барқарорлиги юаннинг бироз мустаҳкамланишига сабаб бўлди.
2022 йил март ойида асосий савдо-ҳамкор давлатларнинг деярли барчасида инфляция кўрсаткичи ўсишда давом этди, — дейилади шарҳда.Россияда ойлик инфляция 8 фоизгача тезлашиб, йиллик ҳисобда 17 фоизни ташкил этиши прогноз қилинмоқда. Ой давомида гўшт, ёрма ва сут маҳсулотлари нархлари сезиларли ошди. Шунингдек, импорт автомобиллари, кийим-кечак, маиший кимё воситалари ҳамда дори-дармонлар нархи ўсиши тезлашди.
Қозоғистонда ойлик инфляция 3,7 фоизни ташкил этиб, йиллик ҳисобда 12 фоизга етди. Озиқ-овқат маҳсулотлари ойлик 5,8 фоизга (йиллик 15,4 фоизга), ноозиқ-овқат маҳсулотлари — 2,8 фоизга (йиллик 10,9 фоизга) ҳамда хизматлар 1,4 фоизга (йиллик 8,3 фоизга) ўсди.
Туркияда дунёда энергия маҳсулотлари нархлари ошиши фонида ойлик инфляция кўрсаткичи юқорилаб, 5,5 фоизга етди, йиллик ҳисобда 61,1 фоизгача ошди. Бу сўнгги йигирма йилликдаги энг юқори кўрсаткич ҳисобланади. Шунингдек, мамлакатда ишлаб чиқарувчилар нархлари индекси ойлик ҳисобда 9,2 фоизга ўсиб, йиллик 115 фоизга етди.
Аввалроқ Ўзбекистоннинг қайси вилоятларида нархлар ошиши кўпроқ сезилгани маълум бўлган эди.
Изоҳ (0)