“Markazlashgan manbalar hisobidan ipoteka va ta’lim kreditlari uchun ajratiladigan mablag‘lar bo‘yicha foiz stavkalarini belgilash to‘g‘risida”gi prezident qarori qabul qilindi. Qarorga ko‘ra, O‘zbekistonda ipoteka dasturlari va ta’lim kreditlari bo‘yicha foiz stavkalari yil oxirigacha o‘zgarishsiz qoladi.
Hujjat bilan Moliya vazirligi tomonidan tijorat banklariga ipoteka va ta’lim krediti uchun ajratiladigan resurs mablag‘lari bo‘yicha foiz stavkalarini 2022-yil yakuniga qadar, istisno tariqasida, amaldagi foiz stavkalarida, ya’ni ipoteka krediti bo‘yicha — 13 foiz, ta’lim krediti bo‘yicha — 10 foiz miqdorida saqlab qolish ma’qullangan. Bunda, 10 foiz stavkada ajratilgan resurslar hisobidan ta’lim kreditlari tijorat banklari tomonidan kredit oluvchiga 14 foizdan ajratiladi.
Belgilanishicha, Moliya vazirligi tomonidan ajratilgan resurs mablag‘lari hamda tijorat banklarining ipoteka va ta’lim kreditlari bo‘yicha foiz stavkalarini mutanosib ravishda kamaytirish mexanizmi Markaziy bankning asosiy stavkasi 14 foizdan pasayganda qo‘llaniladi.
Eslatib o‘tamiz, mart o‘rtalarida O‘zbekistonda asosiy stavka 2018-yildan beri birinchi marta ko‘tarildi. Moliya vaziri Timur Ishmetov Markaziy bank stavkasi oshirilganiga qaramay, ta’lim va ipoteka kreditlari foz stavkalari yil oxirigacha o‘zgarishsiz qolishini ma’lum qilgandi. Qayd etilishicha, prezident makroiqtisodiy barqarorlikni ta’minlash bo‘yicha topshiriqlar bergan. Jumladan, Markaziy bankning asosiy stavkani 14 foizdan 17 foizga o‘zgartirishi tashqi omil ta’sirida vaqtinchalik chora sifatida ko‘rilmoqda.
Izoh (0)