2022-yilning mart oyida Markaziy bank tomonidan o‘tkazilgan so‘rov natijalariga ko‘ra, aholi tomonidan sezilgan inflyatsiya fevral oyidagi ko‘rsatkichga nisbatan 2,6 foiz bandga yuqorilab, 15,7 foizni tashkil etdi.
Mart oyida inflyatsiyaning ta’siri 2 va 2—4 mln so‘m daromadga ega bo‘lgan uy xo‘jaliklariga ko‘proq ta’sir ko‘rsatdi. 2 mln so‘mgacha daromad qiluvchi oilalarning oziq-ovqat inflyatsiyasi 15,7 foizni tashkil qilgan bo‘lsa, 2 milliondan 4 mln so‘mgacha daromad qiluvchi oilalarda bu 12 foizgacha ko‘tarildi.
Yuqori daromadli oilalar uchun oziq ovqat inflyatsiyasi 8,6 foizga teng bo‘ldi. Ular kam daromadli guruhga nisbatan inflyatsiya ta’sirini kamroq sezishdi.
So‘rovnomada umumiy javob beruvchilarning aksariyat qismi inflyatsiyani 9-12 foiz atrofida sezishgan. Narxlar oshishining yuqori bo‘lganini ta’kidlagan aholi orasida ham o‘sish kuzatilgan.
Ko‘pchilik mart oyida shakar va qandolat mahsulotlari, yog‘ hamda go‘sht va sut mahsulotlari qimmatlaganini sezgan bo‘lsa, dukkakli mahsulotlar, tibbiy xizmatlar hamda ichimliklar narxlari o‘sishi kamroq sezilgan.
Tibbiyot, savdo, qurilish hamda davlat tashkilotida faoliyat yuritayotgan aholi tomonidan sezilgan inflyatsiya darajasi boshqa soha vakillariga nisbatan yuqoriroq bo‘lgan.
Sirdaryo, Samarqand hamda Farg‘ona viloyatlarida inflyatsiya qolgan hududlarga qaraganda yuqoriroq sezilgan bo‘lsa, nisbatan past ko‘rsatkichlar Surxondaryo viloyati va Qoraqalpog‘iston Respublikasida qayd etilgan.
Mart oyida yillik inflyatsiya 10,5 foizni tashkil qilgan bo‘lsa, oziq-ovqat mahsulotlari inflyatsiyasi esa 14,5 foizga yetdi. Narxlarning o‘zgarishi yuqori daromadli guruhlarga nisbatan kam daromadli guruhlarda ko‘proq sezilgan.
Avvalroq O‘zbekistonda mart oyidagi inflyatsiya so‘nggi 9 oy ichida eng yuqorisi bo‘lgani ma’lum qilingandi.
Izoh (0)