Pokiston parlamenti bosh vazir Imron Xonga nisbatan ishonchsizlik votumini qabul qilib, uni lavozimidan chetlatgani to‘g‘risida xabar berilgandi. Dawn nashrining ma’lum qilishicha, mamlakatda o‘n minglab odam sobiq bosh vazir va u boshchilik qiladigan “Tehrik-i-Insaf” partiyasini qo‘llab-quvvatlash maqsadida ommaviy norozilik aksiyasiga chiqqan.
Norozilik namoyishlari Pokistonning barcha yirik shaharlarida, jumladan, poytaxt Islomobodda ham bo‘lib o‘tgan.
Imron Xon o‘zining Twitter’dagi sahifasi orqali ushbu kun “rejimni o‘zgartirishni maqsad qilgan xorijliklar fitnasi”ga qarshi “ozodlik kurashi”ning boshlanishi deb yozgan. U o‘z tarafdorlariga minnatdorchilik bildirgan.
“Barcha pokistonliklarga garov evaziga ozod qilingan bir guruh firibgarlarni hokimiyat tepasiga keltirish maqsadida AQSH tomonidan qo‘llab-quvvatlanayotgan harakatlarga qarshi norozilik namoyishlari uchun, rahmat”, — deb yozadi siyosatchi.
Eslatib o‘tamiz, 3-aprel kuni Pokiston prezidenti Orif Alviy bosh vazirning taklifiga binoan Milliy Assambleyani (parlament quyi palatasi) tarqatib yuborgandi. Bu muxolifatning Xonni mamlakatdagi iqtisodiy vaziyatni yaxshilay olmayotganlikda, shuningdek, korrupsiyada ayblab, bosh vazirga ishonchsizlik votumini e’lon qilishga urinishlar boshlanganidan keyin yuz berdi.
Imron Xon hokimiyatdan chetlatishga urinishlar uning Xitoy va Rossiya bilan yaxshi munosabatlarini yoqtirmaydigan xorijiy davlatlar, xususan, AQSHning aralashuvi bilan amalga oshirilganini aytdi. Vashington bu ayblovlarni rad etmoqda.
10-aprel kuni esa Pokiston parlamenti bosh vazir Imron Xonga nisbatan ishonchsizlik votumini qabul qilib, uni lavozimidan chetlatdi. Votumga ovoz berishni 342 deputatdan 174 nafari qo‘llab-quvvatlagan — jarayon 13 soatga yaqin davom etgan.
Izoh (0)