Agar Kiyev NATO a’zosi bo‘lganida Rossiyaning Ukrainaga bostirib kirishi sodir bo‘lmasdi, dedi prezident Vladimir Zelenskiy. Bu haqda u Associated Press nashriga bergan intervyusida aytib o‘tdi.
“Agar NATO tarkibida bo‘lganimizda bu urush bo‘lmasdi. Yoki boshqacha kechardi. Biz yaqin qo‘shnilarimizga suyanardik, birga kurashardik. Ammo ishonchim komil, urush bo‘lmas edi”, — dedi u.
Ukraina prezidenti G‘arbdagi hamkorlari tomonidan taqdim etilgan qurollarning ayrim turlari Ukrainaga juda kech yetib kelganini aytdi. Zelenskiyning ta’kidlashicha, u bir qator Yevropa yetakchilaridan “100 foiz qo‘llab-quvvatlash” ko‘rmoqda, boshqalari esa pozitsiyalarini o‘zgartirib olgan.
Zelenskiy Rossiya bilan tinchlik muzokaralari haqida gapirar ekan, ukrainaliklar urushning tugashini va tinchlikni qabul qilishni istashini, lekin bu ularning shartlariga ko‘ra bo‘lishini ta’kidladi.
Odamlar qanday vaziyatda bo‘lmasin tinchlikni qabul qiladi, chunki ular urush tugashini xohlaydi. Bizning shartlarimizda, mustaqillik shartlarida, Ukraina shartlarida... Farzandlaridan ayrilganlar bor, ular bunga sababchi odamlar bilan biror sharoitda va biror vaqtda muzokaralardan qanoatlanadi, deb o‘ylamayman. Chunki bu katta jarohat...Agar his-tuyg‘ularni bir chetga surib qarasak, qanchalik og‘ir bo‘lmasin, har qanday urush tinchlik bilan yakunlanishi kerakligini, yoki u millionlab qurbonlar bilan nihoyalanishini tushunamiz.
Ha, biz kurashishimiz kerak, lekin bu kurash hayot uchun bo‘lishi zarur. Odamlar bo‘lmasa, oddiy chang uchun kurashilmaydi-ku. Shuning uchun bu urushni to‘xtatish juda muhim. Garchi bu qiyin bo‘lsa ham hissiy jihatdan qiyin. Bu xalqni qiynoqqa solgan odamlar bilan hech kim muzokara qilishni istamaydi... Lekin bizda diplomatik yo‘l bilan yechim topish imkoniyati bo‘lsa, uni qo‘ldan chiqara olmaymiz”, — dedi Ukraina prezidenti.
Izoh (0)