Makron prezidentlik saylovlarining birinchi turida peshqadamlikni saqlab qoldi

Fransiyaning amaldagi prezidenti Emmanuel Makron saylov byulletenlarining 95 foizi sanalgandan so‘ng, davlat rahbariligi uchun bo‘lib o‘tgan saylovlarning birinchi turida peshqadam bo‘lib qolmoqda. Bu haqda Fransiya Ichki ishlar vazirligi xabar berdi. U 27,42 foiz ovoz to‘plagan.

Undan keyingi o‘rinda “Milliy ralli” o‘ng partiyasidan nomzod Marin Le Pen 24,03 foiz ovoz bilan ketmoqda.

Uchinchi o‘rinni “Zabt etilmagan Fransiya” muxolifatchi partiyasi yetakchisi Jan-Lyuk Melanshon (21,57 foiz) egallagan bo‘lsa, to‘rtinchi o‘rinni “Rekonkista” partiyasining yetakchisi Erik Zemmur band etgan (6,97 foiz). Beshinchi pog‘ona Il-de-Frans tumani rahbari, “Respublikachilar” konservativ partiyasidan nomzod Valeri Pekressga nasib etdi (4,76 foiz).

Fransiyada prezidentlik saylovlarining birinchi turi 10-aprel kuni bo‘lib o‘tdi va unda 12 nafar nomzod ishtirok etdi. Dastlabki ma’lumotlarga ko‘ra, ovoz berish jarayonlarida saylovchilarning 65 foizga yaqini ishtirok etgan.

Ekzit-pollarning hisob-kitoblari bo‘yicha Makron saylovlarda Le Pendan kichik natija bilan oldinda ketmoqda — ularning ikkisi ham 24-aprelda bo‘lib o‘tadigan ikkinchi turda ishtirok etadi. 2017-yilgi prezidentlik saylovlarida ikkala siyosatchi ham ikkinchi turga chiqqan va o‘shanda Le Pen Makronga yutqazib qo‘ygandi (mos ravishda 33,9 foiz va 66,1 foiz).

Saylov uchastkalari yopilib, ovoz berish ma’lumotlari e’lon qilinganidan so‘ng, nomzodlarning aksariyati Makronni qo‘llab-quvvatlagan. Zemmur va “Olg‘a, Fransiya” partiyasi yetakchisi Nikolya Dyupon-Enyan Le Penga ovoz berishga chaqirdi.

Ma’lumot uchun, 2014-yilgacha jamoatchilikka uncha tanish bo‘lmagan Makron o‘sha yili bosh vazir Manuel Vals hukumatida Fransiya iqtisodiyot vaziri etib tayinlangan. Bu lavozimda ikki yil faoliyat olib borgan Makron 2016-yilda o‘z partiyasini tuzib, vazirlikdan iste’fo bergan va prezidentlik saylovida qatnashish uchun nomzodini ilgari surgan. 2017-yil may oyida bo‘lib o‘tgan saylovda mutlaq g‘alaba qozonib, Fransiya respublikasining navbatdagi prezidenti etib saylangan — bu bilan u Fransiya respublikasi tarixida eng yosh prezident bo‘ldi.