Ijtimoiy tarmoqlarda Farg‘ona viloyati Toshloq tumani markazidan oqib o‘tuvchi ariqdan neft chiqindilari oqib o‘tib, badbo‘y hid taratayotgani haqida xabar tarqaldi. Viloyat Ekologiya boshqarmasi holat bo‘yicha ma’lumot berdi.
Qayd etilishicha, Toshloq tumani “Teraktagi” MFY hududida fuqarolar tomonidan hech qanday tashkilotlarning ruxsatisiz, noqonuniy ravishda yashash xonadonlaridan quduq qazib, neftga o‘xshash suyuqlikni suv nasoslari yordamida tortib olish holatlari uchramoqda. 9-aprel kuni Ekoinspeksiya xodimlari holat joyini borib o‘rgangan. Haqiqatda fuqarolar tomonidan tortib olingan suyuqlikning ma’lum bir qismi xonadonlardan oqib o‘tgan mahalliy suv ariqlariga oqizilgani aniqlangan.
Holatning oldini olish maqsadida tumandagi mutasaddi tashkilotlar, IIB, FVV va tuman ekologiya xodimlari tomonidan 200 dan ortiq quduqlar ko‘mdirilgan. O‘tkazilgan nazorat tadbirlari davomida neftga o‘xshash suyuqlikni suv ariqlariga oqizayotgan 12 nafar fuqaroga nisbatan Ma’muriy javobgarlik to‘g‘risidagi kodeksning 72-moddasi (suv resurslarini muhofaza qilish qoidalarini buzish) 1-qismiga asosan ma’muriy bayonnoma rasmiylashtirilib, har biriga jarima belgilangan.
Avvalroq Namanganda mahalla arig‘idan qon oqayotgani tasvirlangan video tarqalgani, viloyat FVB holatga munosabat bildirgani xabar qilingandi. Shuningdek, Namanganda kanalizatsiyadan qon oqayotgani to‘g‘risidagi xabarlarga viloyat suv ta’minoti holatga munosabat bildirgani, Qibraydagi ariqdan har kuni qon oqayotgani haqida xabar berilgan.
Izoh (0)