Qozog‘istonning SCAT Airlines aviakompaniyasi Namanganga ilk parvozni amalga oshirdi. Bu haqda “Daryo” muxbiri Azizbek Abduvaliyev xabar bermoqda.
Boeing 737 rusumli havo kemasi Namangan xalqaro aeroportida tantanali kutib olindi.
Samolyot bugun, 8-aprel kuni soat 02:33 da Namangan—Olmaota yo‘nalishida 170 nafar yo‘lovchini Qozog‘istonga olib ketdi.
Qozog‘istondagi yirik aviatashuvchilardan bo‘lgan va shtab-kvartirasi Chimkentda joylashgan SCAT Airlines bugungi kunda mamlakatning ichki yo‘nalishlaridan tashqari Rossiya, Xitoy, Turkiya, Yaponiya, Mo‘g‘uliston, Gruziya, Ozarbayjon va Armaniston kabi o‘ndan ortiq davlatlarga xalqaro parvozlarni amalga oshirib kelmoqda.
Aviakompaniya Namanganga va bu yerdan Olmaotaga parvozlarni muntazam yo‘lga qo‘yish hamda haftasiga ikki marotaba — dushanba va juma kunlari reyslarni amalga oshirishni rejalashtirgan.
Eslatib o‘tamiz, oldinroq Uzbekistan Airways aviakompaniyasi “Sharqiy xab” loyihasi doirasida Namangan—Olmaota—Namangan yo‘nalishida yangi muntazam aviaqatnovni yo‘lga qo‘ygani haqida xabar berilgandi.
Izoh (0)