O‘zbekistonning tashqi qarzi qaysi tarmoqlarga va qanchadan sarflanayotgani ma’lum qilindi

O‘zbekistonning chetdan olinayotgan davlat qarzi qaysi tarmoqlarga va qanchadan taqsimlanayotgani ma’lum qilindi, deb xabar bermoqda O‘zA.

Moliya vazirligi Davlat qarzini boshqarish departamenti direktori Jasur Qarshiboyevning ma’lum qilishicha, joriy yilda davlatning jami qarzi 26,3 milliard dollarni tashkil etadi. Shundan 2,7 milliard dollari ichki qarz, 23,6 milliard dollari tashqi qarz hisoblanadi.

Tashqi qarzning asosiy qismi — 5,9 milliard dollar davlat budjetini qo‘llab-quvvatlashga sarflansa, keyingi o‘rinlarda elektr-energiya tarmog‘i va energetika tizimi joylashgan. Qarzning iqtisodiy tarmoqlar kesimida taqsimlanishi quyidagicha:

• 5,9 milliard dollari davlat budjetini qo‘llab-quvvatlashga;
• 3,1 milliard dollari elektr-energiya tarmog‘iga;
• 2,9 milliard dollari energetika (neft-gaz);
• 2,6 milliard dollari transport va transport infratuzilmasiga;
• 2,4 milliard dollari qishloq va suv xo‘jaligiga;
• 2,1 milliard dollari uy-joy va kommunal sohaga;
• 1,2 milliard dollari tijorat banklariga;
• 1,2 milliard dollari kimyo sanoatiga;
• 0,7 milliard dollari ta’lim va sog‘liqni saqlash sohasiga;
• 0,2 milliard dollari telekommunikatsiya tarmog‘iga;
• 1,3 milliard dollari boshqa yo‘nalishlarga.

Avvalroq O‘zbekistonning yalpi tashqi qarzi birinchi marta 40 mlrd dollardan oshib 41,6 mlrd dollarni tashkil qilgani to‘g‘risida xabar berilgandi. Mamlakat davlat qarzining YIMga nisbatan ulushi 38 foizga yetgan. Jami qarzdan 23,6 mlrd dollar — tashqi qarz, 2,7 mlrd dollar — ichki qarz.