Shavkat Mirziyoyev raisligida 8-aprel kuni “Saxovat”, “Muruvvat” va “Mehribonlik” uylari hamda maxsus maktab internatlari faoliyati bo‘yicha videoselektor yig‘ilishi bo‘lib o‘tmoqda, deb xabar berdi “Daryo” muxbiri.
Qayd etilishicha, prezident 2021-yili yangi joriy etilgan mahallabay tizimi haqida ham gapirib, Toshkent shahrining barcha tumanlari va mahallalariga vazirlar va boshqa rahbarlarni biriktirilganini eslab o‘tdi.
“Endi ushbu rahbarlarga o‘zlari biriktirilgan tuman va mahallalarni rivojlantirish bo‘yicha barcha masalalar bilan shug‘ullanish, jumladan, obodonchilik, ozodalik va ko‘kalamzorlashtirishni ta’minlash, aholining bo‘sh vaqtini mazmunli tashkil etish kabi vazifalarni ham yuklaymiz. Xususan, ular o‘z mahallalarida har haftada kamida 1 marta taniqli san’atkorlar, ijodkorlar va sportchilar ishtirokida konsert, adabiy va ijodiy uchrashuvlarni tashkil etishi shart”, — dedi prezident.
Shuningdek, prezident har oyda o‘ziga biriktirilgan mahallalardagi kamida 10 ta ehtiyojmand nuroniylarni Samarqand, Buxoro va Xiva kabi turizm markazlariga sayohatga olib borishni uyushtirish lozimligini aytdi.
“Har yili kamida 10 nafar ehtiyojmand nuroniyni sanatoriyda davolanishini ta’minlashi ham kerak bo‘ladi. Albatta, bu ishlarni ular o‘z idoralarining foydasi va qo‘shimcha mablag‘lari hisobidan tashkil etadilar. Bundan tashqari, ushbu rahbarlar mamlakatimizda 1-martda boshlangan ‘Yashil yillik’ umumxalq harakatiga o‘z mahallasi aholisini faol jalb etib, uni haqiqiy ma’noda ‘Yashil makon’ga aylantirishni ta’minlashi kerak”, — dedi Shavkat Mirziyoyev.
Davlat rahbari buning uchun har bir mahallada ko‘chalar va ariqlar bo‘ylari, ko‘p qavatli uylar atrofiga kamida 2 ming tup mevali va manzarali daraxtlar, 3-5 ming dona terak qalamchalari va kamida 15 ming dona gul ko‘chatlari ekishni tashkil etish zarurligini ta‘kidladi.
Mavzuga doir:
Izoh (0)