Samarqand shahrida fuqarolar nomiga ularning xabardorligisiz kredit rasmiylashtirib olgan sobiq bank xodimiga nisbatan jinoyat ishi qo‘zg‘atildi, deb xabar beradi Bosh prokuratura huzuridagi departament.
Ma’lum qilinishicha, departamentning Samarqand shahar bo‘limi tomonidan AT “Aloqa bank” viloyat filialining murojaatiga asosan tergovga qadar tekshiruv o‘tkazilgan. Tekshiruv davomida bankning Samarqand “Sharq” kompleks xizmatlar ko‘rsatish markazi sobiq bosh menejeri SH.N. 2021-yil davomida bankka kredit so‘rab murojaat qilmagan 8 nafar fuqaroning nomiga soxta hujjatlar asosida jami 156,3 million so‘m iste’mol kreditini rasmiylashtirib, talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Toshkentda o‘zgalar nomiga 900 million so‘mga yaqin onlayn kredit olgan shaxs aniqlangani, Andijonda 470 million so‘m kredit mablag‘ini talon-toroj qilgan bank xodimlariga nisbatan jinoyat ishi qo‘zg‘atilgani, Jizzaxda o‘zgalar nomiga 120 million so‘m kredit rasmiylashtirib, uni o‘zlashtirgan “Mikrokreditbank” xodimiga jinoyat ishi ochilgani to‘g‘risida xabar berilgandi.
Izoh (0)