Tadbirkorning 15,5 ming dollarini qo‘lga kiritgan Zangiota tumani hokimi yordamchisi va uning sherigi ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Zangiota tumani bo‘limlari tomonidan tezkor tadbir o‘tkazilgan. Tadbir davomida Zangiota tuman hokimining mahallabay ishlash va tadbirkorlikni rivojlantirish masalalari bo‘yicha yordamchisi A.Y. tuman kadastr bo‘limi sobiq xodimi U.A. bilan oldindan til biriktirib, xususiy tadbirkor R.ga “Mevazor” MFYda joylashgan 8 sotix yer maydonida turar joy binosini qurish uchun ruxsatnoma hamda kadastr hujjatlarini tayyorlab berishni va’da qilgani aniqlangan. Buning evaziga ular 2021-yil davomida jami 15,5 ming dollarni qo‘lga kiritgan. Yana 1 000 dollarni olgan vaqtida ushbu shaxslar ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Ohangaron hokimligi xodimi 20 ming dollar pora bilan qo‘lga tushgani, Qo‘qon shahar hokimining 10 ming dollar pora olgan birinchi o‘rinbosari 5 yarim yilga qamalgani to‘g‘risida xabar berilgandi.
Izoh (0)