Самарқанд шаҳрида фуқаролар номига уларнинг хабардорлигисиз кредит расмийлаштириб олган собиқ банк ходимига нисбатан жиноят иши қўзғатилди, деб хабар беради Бош прокуратура ҳузуридаги департамент.
Маълум қилинишича, департаментнинг Самарқанд шаҳар бўлими томонидан АТ «Алоқа банк» вилоят филиалининг мурожаатига асосан терговга қадар текширув ўтказилган. Текширув давомида банкнинг Самарқанд «Шарқ» комплекс хизматлар кўрсатиш маркази собиқ бош менежери Ш.Н. 2021 йил давомида банкка кредит сўраб мурожаат қилмаган 8 нафар фуқаронинг номига сохта ҳужжатлар асосида жами 156,3 миллион сўм истеъмол кредитини расмийлаштириб, талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Бундан олдин Тошкентда ўзгалар номига 900 миллион сўмга яқин онлайн кредит олган шахс аниқлангани, Андижонда 470 миллион сўм кредит маблағини талон-торож қилган банк ходимларига нисбатан жиноят иши қўзғатилгани, Жиззахда ўзгалар номига 120 миллион сўм кредит расмийлаштириб, уни ўзлаштирган «Микрокредитбанк» ходимига жиноят иши очилгани тўғрисида хабар берилганди.
Изоҳ (0)