2022-yildan boshlab pudratchini tanlash jarayonida xarid komissiyasining ishtiroki ilk marotaba to‘liq bekor qilindi. Bu haqda Bosh prokuratura bo‘lim boshlig‘i Abdurahim Muhiddinov 6-aprel kuni AOKAda o‘tkazilgan brifingda ma’lum qildi.
Prezident qaroriga asosan bosh prokuror o‘rinbosari rahbarligidagi Respublika shtabi hamda viloyat va tuman prokurorlari rahbarligida hududiy shtablar faoliyati to‘liq yo‘lga qo‘yilgan. Brifingda ma’lum qilinishicha, shtablar tomonidan dasturlar ijrosi uchun mas’ullar, shu jumladan, buyurtmachi, loyihachi, ekspert va pudratchilarga asosiy talablar tushuntirildi, qonun buzilishiga yo‘l qo‘ymaslik yuzasidan 2 ming nafarga yaqin mansabdor rasman ogohlantirilgan.
Qayd etilishicha, o‘rganishlar natijasida 5 mingdan ortiq pudratchining salohiyati noxolis baholanayotgani, oqibatda ularning reyting ko‘rsatkichlari noto‘g‘ri shakllangani aniqlangan. Shtablarning bu kabi tizimli kamchiliklar omillarini bartaraf etishga qaratilgan takliflar asosida 20 dan ortiq baholash mezonlari bekor qilingan. Shuningdek, reyting ko‘rsatkichlarini 16 ta tashkilotning integratsiyalashgan ma’lumotlar bazalari orqali adolatli shakllantirish tartibi joriy etilgan.
O‘rganishlar asosida 20 mingdan ziyod tajribali va salohiyatli pudratchi saralab olingan. 2022-yildan boshlab pudratchini tanlash jarayonida xarid komissiyasining ishtiroki ilk marotaba to‘liq bekor qilingan. Joriy yilgi dastur doirasida byudjetdan ajratiladigan 23,7 trillion so‘m mablag‘ning maqsadli sarflanishi va ishlarning sifatli bajarilishi yuzasidan nazorat o‘rnatilgan. Shuningdek, manzilli ro‘yxati aniq bo‘lgan 1 728 ta loyihaning har biri monitoringga olingan.
Bundan tashqari, 2022-yilda yangidan boshlanuvchi 1 111 ta obyektning loyiha-smeta hujjatlari ham ishlab chiqilgan. Ularning 999 tasi davlat va 669 tasi kompleks ekspertizadan o‘tkazilgan, 813 tasi tender savdolariga qo‘yilgan.
Izoh (0)