2022 йилдан бошлаб пудратчини танлаш жараёнида харид комиссиясининг иштироки илк маротаба тўлиқ бекор қилинди. Бу ҳақда Бош прокуратура бўлим бошлиғи Абдураҳим Муҳиддинов 6 апрель куни АОКАда ўтказилган брифингда маълум қилди.
Президент қарорига асосан бош прокурор ўринбосари раҳбарлигидаги Республика штаби ҳамда вилоят ва туман прокурорлари раҳбарлигида ҳудудий штаблар фаолияти тўлиқ йўлга қўйилган. Брифингда маълум қилинишича, штаблар томонидан дастурлар ижроси учун масъуллар, шу жумладан, буюртмачи, лойиҳачи, эксперт ва пудратчиларга асосий талаблар тушунтирилди, қонун бузилишига йўл қўймаслик юзасидан 2 минг нафарга яқин мансабдор расман огоҳлантирилган.
Қайд этилишича, ўрганишлар натижасида 5 мингдан ортиқ пудратчининг салоҳияти нохолис баҳоланаётгани, оқибатда уларнинг рейтинг кўрсаткичлари нотўғри шакллангани аниқланган. Штабларнинг бу каби тизимли камчиликлар омилларини бартараф этишга қаратилган таклифлар асосида 20 дан ортиқ баҳолаш мезонлари бекор қилинган. Шунингдек, рейтинг кўрсаткичларини 16 та ташкилотнинг интеграциялашган маълумотлар базалари орқали адолатли шакллантириш тартиби жорий этилган.
Ўрганишлар асосида 20 мингдан зиёд тажрибали ва салоҳиятли пудратчи саралаб олинган. 2022 йилдан бошлаб пудратчини танлаш жараёнида харид комиссиясининг иштироки илк маротаба тўлиқ бекор қилинган. Жорий йилги дастур доирасида бюджетдан ажратиладиган 23,7 триллион сўм маблағнинг мақсадли сарфланиши ва ишларнинг сифатли бажарилиши юзасидан назорат ўрнатилган. Шунингдек, манзилли рўйхати аниқ бўлган 1 728 та лойиҳанинг ҳар бири мониторингга олинган.
Бундан ташқари, 2022 йилда янгидан бошланувчи 1 111 та объектнинг лойиҳа-смета ҳужжатлари ҳам ишлаб чиқилган. Уларнинг 999 таси давлат ва 669 таси комплекс экспертизадан ўтказилган, 813 таси тендер савдоларига қўйилган.
Изоҳ (0)