Sog‘liqni saqlash vazirligi sohasiga oid qonunchilik hujjatlari korrupsiyaga qarshi ekspertizadan o‘tkazilganda 70 ta hujjatning 13 tasida 41 ta korrupsiyaviy omil mavjudligi aniqlangan. Bu haqda Senat raisi Tanzila Norboyeva Korrupsiyaga qarshi kurashish milliy kengashining navbatdagi majlisida aytib o‘tdi, deb xabar bermoqda “Daryo” muxbiri.
Ma‘lum qilinishicha, Sog‘liqni saqlash vazirligining komplayens, ichki audit va moliyaviy nazorat xizmati tomonidan 395 ta davolash-profilaktika muassasalarida o‘tkazilgan o‘rganishlar davomida 59 mlrd so‘mdan ortiq miqdordagi moliyaviy xato-kamchiliklar aniqlangan. Shuningdek, davlat budjetiga yetkazilgan 9 mlrd so‘mlik zarar undirilgan.
Bundan tashqari, 2021-yilda “dxarid.uz” portali orqali vazirlik tomonidan qiymati 23,1 mlrd so‘mlik davlat xaridlarida 11,1 mlrd so‘m miqdoridagi 33 ta tanlovda qonun talablari buzilishiga yo‘l qo‘yilgani aniqlangan.
Mahalliy hokimliklar tomonidan vazirlik tizimidagi bino va yerlarning noqonuniy ravishda berib yuborilishiga oid 40 dan ortiq holatlar kuzatilgan.
“Sog‘liqni saqlash vazirligi tizimida so‘nggi ikki yilda 732 nafar shaxs korrupsiyaviy jinoyatlar sodir etganlikda aybdor deb topilgan. Xususan, agar 2020-yilda 302 nafar shaxs korrupsiyaviy jinoyat sodir etgan bo‘lsa, 2021-yilda ularning soni 430 nafarga yetgan. Tizimdagi kamchiliklarni aholi fikrini o‘rganish natijalaridan ham ko‘rish mumkin”, — deydi Senat raisi.
Tanzila Norboyevaning aytishicha, sohaga oid qonunchilik hujjatlari korrupsiyaga qarshi ekspertizadan o‘tkazilganda 70 ta hujjatning 13 tasida 41 ta korrupsiyaviy omil mavjudligi aniqlangan.
Izoh (0)