Xorazm viloyati, Urganch shahridagi “Yoshlik ko‘li” dam olish maskani kimoshdi savdosiga qo‘yildi. Lot ma’lumotlari E-auksion portalida e’lon qilingan.
Lot izohida yozilishicha, 2013-yilda qurilgan “Yoshlik ko‘li” barcha asosiy vositalar bilan savdoga chiqarilgan.
Yer uchastkasining umumiy maydoni 0,07 gektar. Binoning umumiy maydoni — 777 kvadrat metr. Dam olish maskanida gaz, suv va kanalizatsiya tizimi mavjud emas. Elektr ta’minoti esa bor.
Auksionga qo‘yilgan dam olish maskanining boshlang‘ich bahosi — 4,42 mlrd so‘m. Arizalar 29-aprel 09:00 ga qadar qabul qilinadi. Savdolar xuddi shu kuni 10:00 da boshlanadi.
Avvalroq Navoiydagi mehmonxona va choyxona MIB tomonidan 18,5 mlrd so‘mga auksionga qo‘yilgani haqida xabar berilgan edi.
Izoh (0)