2021-yilda korrupsiyani qabul qilish indeksida O‘zbekiston 6 pog‘onaga ko‘tarilib, 180 ta mamlakat orasida 140-o‘rinni egalladi. Bu haqda Oliy Majlis Senatida bo‘lib o‘tayotgan Korrupsiyaga qarshi kurashish milliy kengashning navbatdagi majlisida ta’kidlandi, deb xabar bermoqda “Daryo” muxbiri.
Majlis avvalida Senat raisi Tanzila Norboyeva sohalardagi korrupsiyaviy holatlar haqida ma’lumot bergan. Qayd etilishicha, mamlakatda 2021-yilda 5 483 nafar shaxsga nisbatan 3 769 ta korrupsiyaviy jinoyat ishlari sudlarga oshirilgan. Ya’ni sudga yuborilgan jinoyat ishlari hamda javobgarlikka tortilgan shaxslar soni o‘rtacha 3 baravarga ko‘paygan.
Sudlarga yuborilgan jinoyat ishlarining har uchtadan bittasi sog‘liqni saqlash, ta’lim va bank tizimi xodimlari tomonidan sodir etilgan. Korrupsiyaga qarshi kurashish borasida olib borilgan keskin choralar natijasida sudga yuborilgan jinoyat ishlari soni o‘tgan yilga nisbatan bank sohasida 300 foizga, ta’lim tizimida 120 foizga hamda sog‘liqni saqlash sohasida 100 foizga ortgan.
“Tahlillarga ko‘ra, bugungi kunda, korrupsiyaga oid jinoyatlarni sodir etishda to‘g‘ridan to‘g‘ri poraxo‘rlik bilan emas, balki firibgarlik yo‘li bilan o‘zgalar mulkini o‘zlashtirish yoki rastrata yo‘li bilan talon-toroj qilish ko‘rinishidagi jinoyatlarni sodir etish holatlari ko‘paymoqda. Albatta, bu bilan jamoatchilik ongida korrupsiya bilan bog‘liq jinoyatchilik ortmoqda, degan bir tomonlama fikr shakllanishi kerak emas”, — deydi Senat raisi.
Tanzila Norboyevaning aytishicha, davlat xaridlari va sog‘liqni saqlash sohalari tahlil qilinganida, dasturlar, “yo‘l xaritalari” va boshqa chora-tadbirlar rejalari qabul qilinmoqda, vazifalar belgilanmoqda, lekin ularda belgilangan vazifalar bajarilmasdan qolmoqda.
Izoh (0)